د لغمان قرغیو کې پر ۳۰ بزګرانو د کورنیو باغچو اړونده توکي ووېشل شول
د لغمان د کرنې، ابولګولو او مالدارۍ ریاست د ملګرو ملتونو د پراختیایي ادارې په مالي او د «سارکوډو» مؤسسې په تخنیکي همکارۍ ددې ولایت د قرغیو ولسوالی پر ۳۰ بزګرانو د کورنیو باغچو اړوند اته ډوله توکي وېشلي دي.
د کورنیو باغچو اړونده دا توکي د غیر موسمي سبو د تولید، مېرمنو ته د کارموندنې، د مېرمنو ونډه د دوی د کورنیو په اقتصادي غوړېدا او د خوراکي تنوع په پار پر دغو بزګرانو وېشل شوي دي.
د لغمان ولایت د کرنې ریاست وایي، چې د دغو توکو له وېشلو څخه موخه، د غیرموسمي سبو کښت او تولید دي چې، په عملي کېدو سره یې مېرمنو او بېوزله بزګرانو ته د کار زمینه برابره او د دوی د کورنیو د اقتصادي ودې لامل کېږي.
