د دایکندي له والي، د خلکو استازو او مدني فعالانو سره د کرنې وزارت د سرپرست لیدنه:

د وزارت له کړنو ستاینه او د خلکو نورې غوښتنې وړاندې شوې

۷ زمری ۱۳۹۹

د کرنې، اوبولګولو او مالدارۍ وزارت سرپرست او د اوبولګولو او طبیعي سرچینو مرستیال حشمت الله غفوري د خپل کار په دفتر کې د دایکندي له والي احمد ضیاء همدرد، په ولسي جرګه او ولایتي شوراکې ددغه ولایت استازو او ددې ولایت له یوشمېر مدني فعالانو سره وکتل. په دې لیدنه کې دوی د کرنې وزارت کړنې وستیلې.

په دې لیدنه کې، د دایکندي والي احمد ضیاء همدرد په دایکندي کې د کرنې وزارت له اغېزناکو او ښو کړنو مننه وکړه. په دې لیدنه کې، دغه راز په ولسي جرګه او ولایتي شورا کې د دایکندي د خلکو یوشمېر استازو او ددې ولایت یوشمېر مدني فعالانو هم په دې ولایت کې د کرنې وزارت د پروژو د پلي کېدو ستاینه او ممنه وکړه او وویل، چې ددې ولایت د کرنې سکټور ته لازمه پاملرنه شوې او د بزګرانو ستونزې په پام کې نیول شوي دي. دوی هیله څرګنده کړه، چې په دې ولایت کې د کرنیزو فعالیتونو په برخه کې دې هڅې کړندۍ شي.

په دې غونډه کې د دایکندي والي احمد ضیاء همدرد په څو برخو کې ددې ولایت وړاندیزونه د کرنې وزارت د اوبولګولو او طبیعي سرچینو مرستیال ته وړاندې کړل.

د دایکندي والي غوښتنه وکړه، چې د بادامو د ښه پروسس په پار باید په دایکندي کې د بادامو د پروسس یو مرکز جوړ شي، ددې ترڅنګ د یوې سړې خونې جوړول او د اوبولګولو د پروژو پلي کېدل د دایکندي د والي نورې غوښتنې وې.

ښاغلي همدرد دغه راز وویل، چې ددې ولایت د مالدارۍ د ودې په پار دې باید په دې ولایت کې د چرګانو روزنې فارمونه جوړ شي او دغه راز د دایکندي په هغو سیمو کې، چې مناسب اقلیم لري، د کب روزنې پر فارمونو هم باید کار ووشي.

په همدې حال کې دکرنې، اوبولګولو او مالدارۍ وزارت سرپرست او د اوبولګولو او طبیعي سرچینو مرستیال حشمت الله غفوري وویل، ددوی غوښتنې به د روان او راتلونکې کال په بهیر کې به په پام کې ونیول شي او دغه راز بودیجې او امکاناتو ته په کتو به په نورو برخو کې هم کار ووشي.