د خوست د سپیرې ولسوالۍ د توت کلي د ویالې او ناوو چارې بشپړ او ګټې اخیستنې ته وسپارل شول

۲ مرغومې ۱۳۹۹
د خوست د کرنې، اوبولګولو او مالدارۍ ریاست چارواکي وایي، چې ددې ولایت د سپیرې ولسوالۍ اړوند د توت کلي د یوې ویالې او درو ناوو رغنیزې چارې بشپړ او ګټې اخیستنې ته وسپارل شول.
دخوست دکرنې رییس حفیظ الله شاه نوري وایي، چې په یاده پروژه کې د ۲۱ مترو په اوږدوالی ویاله په پاخه او اساسي ډول رغول شوی دی او ترڅنګ یې له خوړ نه د اوبو د تېرولو په پار د ۳۳ مترو په اوږدوالي سره درې ناوې هم جوړې شوي دي، چې لومړی ناوه یې ۱۳ متره، دویمه یې اته متره او درېیمه ناوه یې ۱۲ متره اوږدوالی لري، چې ټول په پاخه او اساسي ډول رغول شوي دي.
دښاغلي نوري په خبره له دې پروژې څخه د توت کلي اړوند ۲۴۰ کورنۍ ګټه پورته کوي او ترڅنګ یې د یادې پروژې په بشپړېدو سره د ویالې اوبه د ناوو په واسطه کرنیزو ځمکو ته ځي، چې په ترڅ کې یې ۲۵۰ جریبه للمي ځمکې د خړوبولو تر پوښښ لاندې راغلي دي.
حفیظ الله شاه نوري وویل، چې ددې پروژې ټولیز لګښت یو میلیونه افغانۍ ده، چې ۸۰ سلنه یې د کرنې ریاست د اړیکو دفتر او ۲۰ سلنه نور یې د یاد کلي اوسیدنکو پرې کړي دي.
ددې پروژې په پلي کېدو کې د سیمې یوشمېر اوسیدونکو ته دکار زمینه هم برابره شوې وه او ترڅنګ یې د اوبو له ضایعانو څخه مخنیوی کوی او دغه راز د هغو ځمکو کرنیز محصولات به هم لوړ کړي، چې د یادې ویالې او ناوو له لارې خړوبیږي.