د خوست دکرنې رییس د اړیکو دفتر ولایتي مسوول سره وکتل
۲۰ کب ۱۴۰۴ه.ش
۲۲ رَمَضانُ المُبارَک ۱۴۴۷ه.ق
د خوست دکرنې، اوبولګولو او مالدارۍ رییس مولوي شیرمحمد ذبیح په دې ولایت کې د اړیکو دفتر«ټيالاو» ولایتي مسوول محمد علي ځدراڼ سره په ناسته کې د یاد دفتر پر پلي شوي او پلي کېدونکو پروژو خبرې وکړې.
یاده ناسته د خوست د کرنې ریاست سلاکار او متخصص بهیر ګل صابري، د پلان او برنامو لوی مدیر اجمل قاسمي او د کرنیزو چارو لوی مدیر عبدالسلام همت یار په ګډون ترسره شوه.
د ناستې په پیل کې د خوست د کرنې رییس د اړیکو دفتر«ټيالاو» ولایتي مسؤل ته د ښه راغلاست ترڅنګ، د یادې مؤسسې له لوري د پخوانیو تطبیق شوو پروژو څخه مننه وکړه او هیله یې څرګنده کړه، چې په راتلونکي کې هم ورته کرنیزې او پراختیایي پروژې پلي شي.
ورپسې د خوست د کرنې ریاست سلاکار او متخصص بهیرګل صابري د سبو، حبوباتو او مېوو د پروسس کولو، د کرنیزو محصولاتو د ساتنې لپاره د سړو خونو جوړولو، او همدارنګه د له کمې ځمکې څخه د زیات حاصل ترلاسه کولو په موخه د لوړکیفیت لرونکو بڼونو او شنو خونو د جوړولو غوښتنې مطرح کړې.
په همدې حال کې د اړیکو دفتر«ټيالاو» ولايتي مسوول ښاغلي ځدراڼ د یادو غوښتنو د پوره کولو ډاډ څرګند کړ او د کرنې ریاست سره یې د همکارۍ په دوام کې یې سل د سرو املوکو نیالګي او ۲۰۰ د ناکو نیالګي هم وسپارل.
د ناستې په پای کې د خوست د کرنې رییس ددې ولایت د کرنې، اوبو لګولو او مالدارۍ ریاست له لوري د هر اړخیزې همکارۍ ډاډ څرګند کړ.
