د خوست دوو ولسوالیو کې د باراني اوبو د مدیریت پروژې چارې پیل شوې
د خوست دکرنې، اوبولګولو او مالدارۍ ریاست وایي، چې ددې ولایت د علیشېر او ترېزیو ولسوالۍ کې د افغانستان لپاره د ناروې کمیټې په همکارۍ د باراني اوبو د مدیریت په پار د چکډمونو او غوچوړو کېندلو پروژې چارې پیل شوي دي.
د چارواکو په خبره په همدې موخه د افغانستان لپاره د ناروې کمیټې له خوا پر ۱۷۲۰ کاریګرو بیلچې، کلنګونه او واسکټونه وېشل شوي دي، چې ددې پروژې په ترڅ کې په ۲۰ وروځو کې به د یادو ولسوالیو په یوشمېر سیمو کې خاورین چکډمونه او غوچوړې کیندل کېږي.
ددې پروژې موخه د باراني اوبو مدیریت او په ټوله کې د ځمکې لاندې اوبو د کچې زیاتول او مالدارانو او بزګران ته د دوی د اړتیا وړ اوبه برابرول دي.
