د بینيحصار فارم کارکوونکي د یاد فارم د تولید زیاتوالي په موخه روزل کېږي
۹ وری ۱۴۰۰
دکرنې، اوبولګولو او مالدارۍ وزارت د کرنې او مالدارۍ مرستیال شېرشاه اميري، دکابل د بینيحصار د غوا روزنې له فارم څخه دلیدني پر مهال وویل، چې د تولید زیاتوالي په پار د یاد فارم کارکوونکي روزل کېږي.
ښاغلی اميري، چې د بینيحصار فارم د فرصتونونو، ستونزو او ننګونو د ارزونې په پار یاد فارم ته تللی و زیاته کړه، چې په دې فارم کې باید دشېدې تولیدات ډېر شي او دې موخې ته د رسېدو په پار ددې فارم کارکوونکي باید وروزل شي.
د بینيحصار فارم د کرنې وزارت له مهمو فارمونو څخه دی، چې د لبنیاتو د تولید په برخه کې مهم رول لري.
اوسمهال په دې فارم کې ۱۱۸غواوې ساتل کېږي، چې له دې ډلې، ۳۴ یې شېدې ورکوونکې غواوې دي. هره غوا په منځنۍ کچه د ورځې ۲۰ لیټره شېدې ورکوي.
