د بڼوالۍ ځنځیري ارزښت د پراختیا پروژه د خرماوو ۱۵۰جریبه بڼونه جوړوي

۱۶ مرغومې ۱۳۹۹
د کرنې وزارت د بڼوالۍ ځنځیري ارزښت دپراختیا پروژه «HVCDSP» په پام کې لري، چې د ۱۴۰۰ام مالي کال په ترڅ کې د ننګرهار، لغمان او خوست په ولایتونو کې د خرماوو ۱۵۰ جریبه بڼونه جوړ کړي.
ددغو جوړېدونکو بڼونو له ډلې ۷۵ جریبه یې په ننګرهار، ۵۰ جریبه یې په خوست او ۲۵ جریبه یرې دلغمان په ولایت کې جوړیږي. یاد ولایتونه د خرماوو ونو د ودې په پار مناسبه اوبه-هوا او چاپېریال لري. ددغو بڼونو په جوړېدو سره په یادو ولایتونو کې د خرماوو بڼونو د پراختیا او دودولو په برخه کې اغېزناک ګامونه اخیستل کیږي.
خرما تر ډېره په ګرمو سیمو کې وده کوي.هلمند، فراه، کندهار، لغمان ، خوست او ننګرهار د خرماووپالنې لپاره مناسب اقلیم لري.
د بڼوالۍ ځنځیري ارزښت د پراختیا پروژه د کرنې، اوبولګولو او مالدارۍ وزارت له مهمو پروژو څخه دی، چې د اسیایي پراختیایي بانک «ADB» له خوا تمویلیږي. او د هېواد په ۱۱ ولایتونو کې، چې د مېوو او سبو ستر تولیدوونکي دي د بڼوالۍ ځنځیري ارزښت د پیاوړتیا، د بڼوالۍ محصولاتو د وارداتو د بېلانس بدلون او صادراتو د زیاتوالي په موخه فعالیت کوي.