د بڼوالۍ ځنځيري ارزښت د ودې سکټوري پروژې له لارې ننګرهار کې ۱۰۰جريبه متراکم بڼونه جوړ شوي دي

۱۲چنګاښ ۱۴۰۰
دکرنې، اوبولګولو او مالدارۍ وزارت د بڼوالۍ ځنځيري ارزښت د ودې سکټوري پروژې،HVCDSP له لارې د دوو کالو په ترڅ کې د ننګر هر ولايت د بهسود، بټي کوټ، کوز کونړ او کامې ولسواليو په څه باندې سل جريبه ځمکه کې د سټروسو ۴۵ بڼونه چې مالټې او ليمو په کې شامل دي جوړ کړي دي.
ياد بڼونه ددې ولايت ۵۹ تنو بڼوالو ته جوړ شوي دي. دا بڼونه به راتلونکو درو کالو پورې ثمر ته ورسېږي. دا بڼونه په مسلکي ډول رغول شوي دي او هغو بڼونو سره، چې په دوديزه بڼه رغول شوي دي ډېر توپيرونه لري.
متراکم بڼونه وروسته له دوو کالو حاصل ورکوي، خو هغه بڼونه چې په دوديزه بڼه په خپله د بزګرانو له خوا جوړېږي، نږدې پنځه کاله وروسته ثمر ته رسېږي. دغه راز متراکم بڼونه د دوديزو بڼونو په پرتله ۲۰چنده زيات حاصل ورکوي.
په ننګرهار کې دکرنې وزارت د بڼوالۍ ځنځيري ارزښت د ودې سکټوري پروژې له خوا له جوړشويو بڼونو ۵۶۰ښځې او۴۶۰نارينه په مستقيمه توګه او ۱۵۷۵نارينه او ۱۷۶۳ښځې په غير مستقيمه تو ګه ګټه پورته کوي.
متراکم بڼونه له يوې خوا د حاصلاتو د زياتوالي لامل کېږي او له بلې خوا د سيمې د تودوخې له ټيټوالي سره هم مرسته کوي.
د بڼوالۍ ځنځيري ارزښت د ودې سکټوري پروژه د افغانستان په ۱۱ولايتونو کې د نويو زېربناوو جوړولو، د بڼوالۍ محصولاتو د ځنځيري ارزښت ودې، د کروندګرو وړتياوې لوړولو او دبڼوالۍ محصولاتو د صادراتو پرمختيا په برخه کې فعاليت کوي.
دا پروژه د اسيايي پراختيايي بانک، ADB له خوا تمويل او دکرنې، اوبولګولو او مالدارۍ وزارت له خوا پلي کېږي.
ددې پروژې له لارې په تېرو دوو کالو کې د ننگرهار، کونړ، لغمان، خوست، لوگر، غزني، کابل، پکتیا، پکتیکا، بامیان او میدان وردگو ولايتونو کې ډول ډول متراکم بڼونه چې په کې سټروس، خُرما، ناک او مڼې شامل دي په مسلکي ډول کېنول شوي دي.