د بلخ چمتال ولسوالۍ کې پر ۱۴۲ مېرمنو د عوایدو د پیاوړتیا په موخه نغدې مرستې ووېشل شوې
د بلخ دکرنې، اوبولګولو او مالدارۍ ریاست سره په همغږۍ د چمتال ولسوالی په ۱۴۲ مېرمنو د«سي.اچ.اې» دفتر لهخوا نغدې مرسته ووېشل شوه. دغه مرسته د هغو مېرمنو د اقتصادي ودې لپاره ترسره شوې چې په بڼوالۍ، د چرګانو ساتنې، کورنیو باغچو، خیاطۍ او صابون جوړولو کې بوختې دي.
د «سي.اچ.اې» دفتر د چمتال ولسوالی د کرنیزو خدماتو مدیریت په همغږۍ له دقیقې سروې وروسته دغه مرسته تطبیق کړه. د یادې مرستې له مخې، ۸۳ ښځو ته چې په بڼوالۍ، د چرګانو پالنې او کورنیو باغچو په فعالیتونو کې ښکېلې وې، هرې یوې ته ۳۲۰۰ افغانۍ ورکړل شوې. همدارنګه، ۵۹ هغو مېرمنو ته چې د خیاطۍ او صابون جوړولو په برخو کې کار کوي، فی کس ته ۵۸۰۰ افغانۍ ورکړل شوې.
دغه نغدې مرسته د مېرمنو د اقتصاد د پیاوړتیا، د کورنیو د عوایدو د زیاتوالي او د هغوی د دوامدارو عایداتي فعالیتونو د ملاتړ په موخه ترسره شوې ده، څو د کلیوالي ښځو د کار زمینې پراخې او د هغوی د ژوندانه کچه لوړه شي.گ
