د بلخ په ولایت کې د پیازو ۳۰۰ زېرمتونونه ګټې اخیستنې ته وسپارل شول

۳مرغومې ۱۳۹۹
دکرنې، اوبولګولو او مالدارۍ وزیر ډاکټر انوارالحق احدي، بلخ ولایت ته دخپل سفر په ترڅ کې د کرنیزو محصولاتو پروژې له خوا جوړ شوي د پیازو ۳۰۰ زېرمتونونه د هدادي په ولسوالۍ کې د پیازو د څو زېرمتونونو په پرانستې سره ګټې اخیستنې ته وسپاره.
د پیازو یاد زېرمتونونه د بلخ ولایت په ۱۱ ولسوالیوکې، د ۱۴۷ میلیونه او ۷۰۱ زره او ۴۰۰ افغانیو په لګښت جوړ شوي دي.
د بلخ مرستیال والي، د ولایتي شورا رییس او د بلخ ولایت یوشمېر نورو سیمه ییزو چارواکو او بزګرانو په دې غونډه کې د ښاغلي احدي ملتیا کوله.
په دې غونډه کې د بلخ مالي او اداري مرستیال غلام فاروق خپلواک، د بڼوالۍ او کب روزنې په برخه کې پر پانګونه او د اوبولګولو د پروژو پر پلي کېدو ټینګار وکړ او د بلخ په ولایت کې د کرنیزو محصولاتو مدیریت د پروژې د دوام غوښتونکی شو.
د بلخ د ولایتي شورا مشر، محمدافضل حدید هم په دې ولایت کې د کرنیزو پروژو له پلي کېدو څخه دملاتړ د اعلان ترڅنګ، د بلخ ولایت بزګرانو لپاره داصلاح شویو تخمونو او کیمیاوي سرو د ډېرېدو غوښتونکی شوه او وویل، چې په دې ولایت کې ډېر بزګران فعالیت لري او باید په دې ولایت کې کرنه میکانیزه شي او د پور ورکونې کچه زیاته شي. هغه دغه رازغوښتنه وکړه، چې راتلونکی کال مالدارۍ ته باید ډېره پاملرنه ووشي او ترڅنګ د آمو سیند له اوبو څخه د بلخ د کرنې په موخه ګټه پورته شي.
په همدې حال کې د کرنې وزیر انوارالحق احدي وویل، چې د کرنې وزارت نه یوازې د بلخ په ولایت کې بلکه، د هېواد په کچه سږکال د ۶.۸ میلیارډه افغانیو په لګښت، د کرنیزو محصولاتو مدیریت پروژه پیل کړه، چې په کې زرګونه ودانۍ(ممیزخونې، د پیازو او کچالو زېرمتونونه، د مڼو او انارو صفردرجې سړې خونې او د مېوو او سبو وچوونکي ماشینونه» په کې شامل دي.
د کرنې وزیر وویل، چې په بلخ کې سږکال د کرنیزو محصولاتو مدیریت اړوند ۶۰۳ پروژې پلي شوي دي.
باید وویل شي، چې د بلخ ولایت لپاره د کرنې وزارت سږني ټولیزه بودیجه ۶۸۳ میلیونه افغانۍ ده. ښاغلی احدي وویل، ددې ترڅنګ چې په راتلونکی کال کې د بلخ په ولایت کې د کرنیزو محصولاتو مدیریت پروژه غځیږي، د اوبولګولو، مالدارۍ برخو او د لبنیاتو سکټور کې ځان بسیاینه او پر بڼوالۍ د پراختیا په پار د بېلابېلو پروژو له لارې پاملرنه کیږي، ترڅو د پانګونې کچه زیاته او د کړنو اغېزمنتوب زیات شي.