د امارتي شرکتونو لوی رییس د ننګرهار وادي کرنیز امارتي شرکت له میکانيزه فارمونو او فابریکو لیدنه وکړه
۲۰ مرغومې ۱۴۰۴ه.ش
۲۰ رَجَب المُرَجَّب ۱۴۴۷ه.ق
د امارتي شرکتونو لوی رییس مولوي احمدجان بلال، د ملي پراختیا شرکت له اجرائیوي رییس عبدالرحمن عطاش او یو شمېر نورو مسؤولینو سره یو ځای، د ننګرهار وادي کرنیز امارتي شرکت له میکانيزه فارمونو، تولیدي فابریکو او بېلابېلو تخنیکي برخو څخه نږدې لیدنه وکړه او د یاد شرکت روان فعالیتونه یې له نږدې وڅېړل.
په دې لیدنه کې د ننګرهار وادي کرنیز امارتي شرکت اجرائیوي رییس سید محمد نعیم محمدي، د یاد شرکت درې نور رئیسان او یو شمېر اړوند مسؤولین له پلاوي سره مل وو.
پلاوي د یاد شرکت د ګڼو فعالو برخو تر څنګ، د نجارۍ فابریکې، د زیتونو د پروسس فابریکې او د ماشینرۍ له بېلابېلو څانګو څخه هم لیدنه وکړه او د دغو برخو روان فعالیتونه یې له نږدې وڅېړل.
د لیدنې پر مهال، د امارتي شرکتونو لوی رییس او ورسره مل پلاوي د ننګرهار وادي کرنیز امارتي شرکت روان فعالیتونه مثبت وارزول او اړوندو مسؤولینو ته یې د چارو د لا چټکتیا، اغېزمنتیا او ښه تنظیم په برخه کې لازمې سپارښتنې وکړې.
همدارنګه، د ننګرهار وادي کرنیز امارتي شرکت مسؤولینو د چارو د کیفیت او چټکتیا ډاډ ورکړ او د رهبري له لوري یې په ځینو تخنیکي، پراختیايي او نورو برخو کې د لا زیاتې همکارۍ غوښتنه وکړه.
