د څارویو له لارې د کانګو ناروغۍ د کنټرول په پار ګډ اقدامات؛ ننګرهار کې د همغږۍ ناسته وشوه
۲۷ غویی ۱۴۰۴ ه.ش
۱۹ ذُو ٱلْقَعْدَةِ ۱۴۴۶ه.ق
د ننګرهار د کرنې، اوبولګولو او مالدارۍ رییس مولوي محمد ولي محسن د خپل کار په دفتر کې د ننګرهار د ګمرک رییس مولوي منصورالحق ذاکر سره په کتنه کې، پاکستان هېواد څخه په څارویو کې د کانګو ناروغیو تشخیص،مخنیوي، قرنطین او کرنې، مالدارۍ، صادراتو او وارداتو په برخه کې پر بېلابېلو موضوعاتو خبرې اترې وکړې.
د ننګرهار د کرنې،اوبو لګولو او مالدارۍ رییس مولوي محمد ولي محسن وویل، چې کانګو د څارویو یوه خطرناکه ناروغي ده چې څارویو ته ستر زیان رسوي نو پدې برخه کې د پوره همکارۍ ډاډ ورکړ او همدارنګه دنباتي او حیواني روغتیایي تصدیق چې د کرنې، اوبولګولو او مالدارۍ ریاست کارکوونکو له لورې ورکول کیږي د ګمرک کارکونکو همکاري اړینه وبلله .
دغه راز د ننګرهار دکرنې رییس وویل، د سبو او مېوو په صادراتو او وارداتو کې د اسانتیاوو برابرولو په پار د ګمرک او کرنې ریاستونو ترمنځ غوره همغږۍ باید رامنځته شي. ددې ترڅنګ په دې کتنه کې په ګمرک کې د کرنیزو او مالدارۍ اموالو لیدلو او ګنو نورو مسایلو بحث او دنظرونو تبادله شوه.
د ننګرهارد ګمرک رییس مولوي منصورالحق ذاکر د ننګرهار د کرنې، اوبولګولو او مالدارۍ رییس ته د کانګو مخنیوي او نورو برخو کې د ښې همغږۍ او همکارۍ ډاډ ورکړ.
