دهلمند په موسی کلا ولسوالۍ کې د چکډېم د جوړولو چارې پیل شوې
۴ مرغومې ۱۴۰۴هـ.ش
۴ رَجَب المُرَجَّب ۱۴۴۷هـ.ق
د هلمند ولایت د موسی کلا ولسوالی د غوري سیمې په شمالي برخه کې د اوبو د زېرمه کولو په موخه د یوه چکډېم د جوړولو چارې پیل شوې دي.
یاد چکډېم د هلمند د کرنې، اوبولګولو او مالدارۍ ریاست تر چتر لاندې د کیارو مؤسسې له لوري جوړېږي، چې موخه یې د باراني اوبو مهار، د ځمکې لاندې اوبو پیاوړتیا او د کرنیزو ځمکو د اوبو ستونزې راکمـول دي.
د معلوماتو له مخې، دغه چکډېم ۷۰ متره اوږدوالی، ۲.۵ متره پلنوالی لري، ۱۸۰ سانتيمتره په ځمکه کې ژوروالی او ۳۰۰ سانتيمتره د ځمکې له سطحې پورته لوړوالی لري.
د یادونې وړ ده، چې دا ډول چکډېمونه د موسی کلا ولسوالی لپاره نوښت بلل کېږي او د اوبو د زېرمه کولو، د سیلابونو د مخنیوي او د کرنیزو فعالیتونو د پراختیا په برخه کې مهمې ګټې لري.
د هلمند د کرنې، اوبولګولو او مالدارۍ ریاست چارواکي هڅه کوي، چې ورته چکډېمونه به په راتلونکي کې د ولسوالی په نورو مناسبـو سیمو کې هم جوړ او د ګټې اخیستنې لپاره به ولس ته وسپارل شي.
