خوست کې د پخوانیو معتادینو د اقتصادي پیاوړتیا په پار چرګان او د چرګانو پالنې توکي ووېشل شول
۲۱مرغومې ۱۴۰۴ه.ش
۲۱ رَجَب المُرَجَّب ۱۴۴۷ه.ق
د خوست په ولایت کې د پخوانیو روږدو کسانو د ملاتړ، اقتصادي پیاوړتیا او بېرته ټولنې ته د سالمو او کار وړ افرادو په توګه د ورګرځېدو په موخه د چرګانو او د چرګانو پالنې د اړونده توکو د وېش پروګرام ترسره شو. دغه پروګرام د خوست ولایت د کرنې، اوبو لګولو او مالدارۍ ریاست د کرنیزو چارو آمریت له لوري او د اکشن اېډ موسسې په همکاری په لاره واچول شو.
د پروګرام په لړ کې ۵۰ مستحقو پخوانیو معتادینو ته چرګان او د چرګانې پالنې اړوند توکي ووېشل شول.
د اکشن اېډ موسسې استازي د غونډې ګډونوالو ته د پروګرام د اهمیت، موخو او د عایداتي فرصتونو د رامنځته کولو په اړه مهم معلومات وړاندې کړل، او د دوامدارو اقتصادي مرستو پر اړتیا یې ټینګار وکړ.
وروسته د خوست د کرنې ریاست چارواکو ګډونوالو ته په وینا کې وویل، چې پخواني معتادین د ټولنې عزتمند غړي دي او راتلونکی یې د هغوی په اراده، رغېدو او سالمو هڅو پورې تړلی دی. هغه زیاته کړه چې له زیانمنو او ناوړه موادو څخه د لیرې پاتې کېدو په صورت کې پخواني روږدي کولای شي د ښه ژوند او مثبت بدلون ښه نمونه شي.
دغه راز یادو چارواکو په خپلو خبرو کې د پروګرام د پړاوونو له سمې عملي کېدو خوښي څرګنده کړه او ټینګار یې وکړ چې مؤسسات باید خپلې پروژې په خپل وخت او مسلکي ډول ترسره کړي، څو یې اغېز لوړ او د خلکو ستونزې په واقعي ډول راکمې شي.
د پروګرام موخه د پخوانیو معتادینو اقتصادي پیاوړتیا او هغوی ته د کار زمینه برابرول دي. برخمن شوو کسانو د اکشن اېډ موسسې له مسؤلانه همکاریو مننه وکړه او د ورته دوامدارو مرستو غوښتنه یې وکړه.
