خوست کې د درو واټر شیډونو جوړولو تړونونه لاسلیک شول
۴ زمری ۱۴۰۰
د خوست ولایت د کرنې، اوبولګولو او مالدارۍ ریاست وایي، چې د کرنې وزارت د کرنې او خوړو خوندیتوب بېړنۍ پروژې (EAST) او ددې ولایت د یوشمېر پراختیایي شوراګانو ترمنځ د آبریزې (واټرشېډ) جوړولو تړونونه لاسلیک شوي دي.
د خوست ولایت د کرنې ریاست چارواکي وایي، یاد واټر شیډونه، چې د کرنې ریاست تر چتر لاندې د کرنې او خوړو خوندیتوب بېړنۍ پروژې له خوا جوړېږي، په جوړېدو سره یې د اوبو جذب، د سېلابونو د زیانونو مخنیوی، د سیمې ښکلا او زرغونتیا ته د زمینې برابرولو ترڅنګ خلکو ته کاري فرصتونه هم برابروي.
د چارواکو په خبره ددغو واټرشیډونو د جوړولو ټولیز لګښت ۱۲ میلیونه افغانۍ ده، چې یو یې د موسی خېلو ولسوالۍ د«غلنګ» په سیمه کې او دوه نور یې د ګربز ولسوالۍ میدان اول او شهید کلي کې جوړېږي.
باید وویل شي، چې ددې پروژې په پلي کولو سره د سیمې یوشمېر اوسیدونکو ته د کار زمینه هم برابرېږي.
