خوست ولایت کې د غنمو په حاصلاتو کې د پام وړ زیاتوالی راغلی
۶غبرګولی ۱۴۰۴ ه.ش
۲۹ ذُوٱلْقَعْدَةِ ۱۴۴۶ه.ق
د خوست ولایت د کرنې، اوبولګولو او مالدارۍ ریاست د معلوماتو له مخې، سږ کال په دغه ولایت کې د غنمو حاصلاتو کې د پام وړ زیاتوالی راغلی دی.
د رسمي شمېرو له مخې، سږ کال په خوست کې ۱۸ زره ۵۹۵ هکتاره ځمکه باندې غنم کرل شوي، چې تمه ده له دغو کروندو څخه شاوخوا ۵۰ زره ۶۹۸ ټنه غنم راټول شي.
د خوست د کرنې ریاست مسؤلین وایي، د غنمو د حاصل ښه والي تر ډېره د اصلاح شوو تخمونو، کیمیاوي سرو، او د کرنیزو خدمتونو پایله ده. سږ کال د خوست د کرنې ریاست په همغږۍ د بېلابېلو مؤسسو په مالي ملاتړ، ۱۹ زره ۲۰۰ بزګرانو ته د غنمو اصلاح شوي تخمونه او کیمیاوي سرې وېشل شوي دي.
د خوست د کرنې ریاست ژمن دی، چې ددې ولایت د بزګرانو د لا پرمختګ، کرنیزو ځمکو د حاصلخیزۍ، او د حاصل د کیفیت د لوړوالي لپاره به خپلو هڅو ته دوام ورکړي، تر څو بزګران له خپلو ځمکو نه اعظمي ګټه واخلي او د خپلو هڅو ثمره په ښه ډول تر لاسه کړي.
