خوست ولایت کې د خوسا شوو کچالو د واردولو مخه ونیول شوه  

د خوست ولایت د کرنې، اوبو لګولو او مالدارۍ ریاست د غلام خان بندر نباتي کرنتین مدیریت کارکوونکو یو ټیلر  کچالو، چې له پاکستان څخه افغانستان ته واردېدل، معاینه کړل.
د یادو کچالو له ارزونې او معاینې وروسته په ډاګه شوه، چې شاوخوا ۱.۵ ټنه کچالو خوسا شوي دي. له همدې امله، یاد خراب کچالو له سالمو جلا او په یوه مناسب ځای کې تر خاورو لاندې شول، ترڅو د روغتیايي ستونزو مخنیوی وشي. 
پاتې روغو او باکیفیته کچالو ته د واردولو اجازه ورکړل شوه. د خوست د کرنې ریاست له ټولو سوداګرو غوښتنه کوي، چې باکیفیته محصولات وارد کړي، ترڅو هېوادوال له صحي او معیاري خوراکي توکو څخه استفاده وکړي.