خوست غلام خان بندر کې لس ټنه واردېدونکي خراب کچالو تر خاورو لاندې شول 

د خوست ولایت د کرنې، اوبو لګولو او مالدارۍ ریاست د غلام خان بندر نباتي کرنتین مدیریت لخوا یو ټیلر موټر کې لس  ټنه خراب کچالو له روغو کچالو جلا او تر خاورو لاندې شول.  
یاد کچالو، چې له پاکستان څخه افغانستان ته واردېدل، د کرنتین مدیریت کارکوونکو تر معاینې او ارزونې وروسته، وموندل شول چې لس ټنه کچالو خوسا شوي او بیکاره دي. د روغو کچالو د خوندیتوب لپاره، خراب کچالو له بار څخه جلا او له منځه یووړل، او سالمو کچالو ته د واردېدو اجازه ورکړل شوه.  
د خوست د کرنې ریاست له ټولو سوداګرو هیله کوي، چې باکیفیته محصولات وارد کړي، ترڅو هېوادوال له صحي او پاکو خوراکي توکو څخه ګټه واخلي.