د اوږده عمر لپاره سره مرچ؛ کندهار کې یې حاصلات ډېر شوي
۲۴ لیندۍ ۱۳۹۹
د کندهار دکرنې، اوبولګولو اومالدارۍ ریاست چارواکي وایي، چې په دې ولایت کې د نورو سبو او ترکاریو ترڅنګ د سره مرچو کروندې هم کال تر بلې په پراخېدو دي، چې حاصلات یې هم ورسره کال تر بلې زیاتیږي.
د کندهار دکرنې، اوبولګولو او مالدارۍ رییس سید حفیظ الله سیدي وایي، چې د کندهار ولایت خاوره د هر ډول سبو او ترکاریو لپاره مناسبه ده، په همدې موخه په دې ولایت کې د ګڼو نورو ترکاریو او سبو ترڅنګ د سرو مرچو کروندې هم کال تربلې زیاتیږي.
ښاغلی سیدي وایي، چې د کندهار د ولایت په کچه په نږدې درې زره او ۵۰۰ جریبه ځمکه کې د سرومرچو کرکېله کیږي، چې ددغو کروندو د وچو سرو مرچو ټولیزه کچه څه باندې دوه زره ټنو ته رسیږي.
سید حفیظ الله سیدي وایي، چې د کندهار په ټولو ولسوالیو کې سره مرچ کرل کیږي، خو ددې ولایت په ارغستان، بولدک، دامان او معروف ولسوالیو کې د سرو مرچو کروندې تر نورو ولسوالیو ډېر دي.
د کندهار د کرنې رییس زیاته کړه، چې د مګړۍ ددې ولایت په بازارونوکې د یوه کیلو وچو سرو مرچو بیه ۲۰۰ تر ۲۵۰ افغانۍ ده، چې ورسره کروندګرو ته ښه عواید په لاس راځي.
