فاریاب کې د یوې سترې او معیاري سړې خونې د جوړولو چارې پیل شوې
۳۱ وری ۱۳۹۹
د فاریاب په ولایت کې د یوې سترې او معیاري سړې خونې د جوړولو چارې پیل شوې. دغه سړه خونه چې جوړولو یې ۱۸۰ میلیونه افغانۍ لګښت لري، د بنسټ دبره یې د فاریاب والي نقیب الله فایق او یو شمېر نورو چارواکو له خوا کېښودل شوه.
دغه سړه خونه یو معیاري او عصري سړه خونه ده، چې په درې زره متر مربع ځمکه کې جوړیږي. ټاکل شوې، چې دغه سړه خونه د یوزر او ۵۰۰ مټریک ټنه مېوو او سبو د ساتنې وړتیا ولري.
دغه سړه خونه د کرنې وزارت له خوا ډیزاین او د جوړولو چاري یې د ملي پراختیا شرکت له خوا پر مخ وړل کیږي.
ددې سړې خونې د جوړولو په لړ کې، چې کابو دوه کاله نیسي، ۱۵۰ کسانوته به د کار زمینه هم برابره شي. دغه راز تر بشپړېدو وروسته به ۳۰ کسانو ته د تلپاتې دندې زمینه هم برابره کړي.
د سبو او مېوو عمر زیاتول، د دغو محصولاتو د بیو کنټرول، د بزګرانو اقتصادي وده او په بېلابېلو موسمونو کې د مېوو او سبو د وارداتو په کچه کې کموالی راوستل ددې سړې خونې ګټې دي.
تر دې وړاندې هم د کاپیسا، پروان، میدان وردګ، غزني او تخار په ولایتونو کې د ورته سړوخونو د جوړولو چارې پیل شوې وې او ټاکل شوې ده، چې په یوشمېر نورو ولایتونو کې هم ورته سړې خونې جوړې شي.
