میکانیزه کرکیلې په پار هڅې: ننګرهار کې د کروندګرو ټولنو سره مرسته وشوه
د ننګرهار د کرنې، اوبولګولو او مالدارۍ ریاست سره په همغږۍ د خوړو نړیوال پروګرام په مالي او د افغانستان راتلونکي نسلونو مؤسسې په تخنیکي همکارۍ د ۳ میلیونه افغانیو په ارزښت لاسي ټراکټورونه او دشاتو مچیو صندوقونه او وسایل وېشل شوي دي.
د ننګرهار د کرنې،اوبولګولو او مالدارۍ رییس مولوي عبدالستار محمد وویل، چې د افغانستان راتلونکي نسلونو مؤسسې له لورې په رودات، کوټ او بهسودو ولسوالیو کې جوړو شویو کرنیزو ټولنو ته ۶ عرادې لاسي ټراکټورونه ورکړل شوي دي، چې له یادو ټراکټورونو څخه د کړنلارو او اساسنامې له مخي په خپلو کروندو کې ګټه پورته کړي.
د ننګرهار دکرنې رییس زیاته کړه،چې یادې مؤسسې په کوزکونړ ولسوالی کې کرنیزي اتحادي ته د شاتو مچیو ترویج او شاتو تولید زیاتوالې په موخه ۴۰ تنو ته د شاتو مچیو ترڅنګ وسایل او مواد هم ورکړل.
ښاغلي محمد وویل،چې په وسایلو کې هر نفر ته لس د مچیو لرونکي او لس تش صندوقونه، دودکش، شاتو پروسس ماشین، جامې، رمبي، څټک، ۵۰ کیلو یې بوشکه، مرتبانونه، برس، دستکشې، ویکس، چاقو، درمل او موم ورکړل شوي دي.
د یادو وسایلو او موادو د ورکړې موخه پدې ولایت کې د بېوزلۍ کچې کمول او خوړو خوندیتوب رامنځته کول دي.
