هلمند کې د پستې ۵۰ جریبه بڼونه جوړیږي
۲۳ وږی ۱۳۹۸
د هلمند د کرنې، اوبولګولو او مالدارۍ ریاست وایي، ټاکل شوې چې د کرنې وزارت د بڼوالۍ او مالداررۍ ملي برنامې «NHLP» او د «مرسي کور» بدیل معیشت پروګرام له لارې ځمکوالو او بڼوالو ته د پستې ۵۰ جریبه نوي بڼونه جوړ شي.
د هلمند د کرنې رییس زلمی الکو وایي ددې پروسې په لړ کې په دې ولایت کې د پستې ۵۰ جریبه نوی بڼونه جوړیږي.
ښاغلي الکو زیاته کړه، چې په همدې موخه د کرنې ریاست له خوا د مرسي کور دبدیل معیشت پروګرام په همکارۍ د مرکز لښکرګاه او نهرسراج ولسوالیو څه باندې ۱۰۰ تنو بڼوالو او ځمکوالو ته د پستې نیالګیو د پیوند په پار روزنیز پروګرام په لاره واچول.
ګډون والو ته په دې پروګرام کې د پستې نیالګیو پیوند، د ځمکې ډیزاین او نقشې او همداراز د پستې بڼونو جوړولو اړوند اړینې لارې چارې په عملي او نظري ډول وښودل شول.
په هلمند کې د پستې ۵۰ جریبه نوي بڼونه په داسې حال کې جوړیږي، چې تر دې وړاندې هم د هلمند د کرنې ریاست له خوا په دې ولایت کې د پستې ۳۱۴ جریبه بڼونه جوړې شوې دي، چې د دغو بڼونو ښې پایلې نور کروندګر هم وهڅول، چې په خپلو ځمکو کې د پستې بڼونه جوړ کړي.
