میدان وردګ کې ۲۲۱ پروژې د بشپړېدو په درشل کې دي
۱9 لړم ۱۳۹۹
د میدان وردګو ولایت د کرنې، اوبولګولو او مالدارۍ ریاست چارواکې وایې، چې په دې ولایت کې د کرنیزو محصولاتو مدیریت د پروژې په اډانه کې د ۲۲۱ بېلابېلو پروژو چارې په چټکۍ روانې دي، چې ډېر ژر به ګټې اخستنې ته وسپارل شي.
د میدان وردګو ولایت د کرنې، اوبولګولو او مالدارۍ رییس ولید احمد تسل وایې، د کرنیزو محصولاتومدیریت د پروژې په اډانه کې د میدان وردګو ولایت په مرکز او ددې ولایت په سید اباد، نرخ، چک، بهسود، جغتو، جلریز او دیمرداد ولسوالیو کې د ۲۵۰ میلیونه او ۶۸۹ زره او ۳۶۶ افغانیو په لګښت د ۲۲۱ کرنیزو پروژو چارې روانې دي، چې رغنیزې چارې یې د بشپړېدو په درشل کې دي.
ددغو پروژو ۹۰ سلنه لګښت د کرنې وزارت او لس سلنه لګښت یې د برخمن شویو بڼوالو او بزګرانو له خوا ورکول کیږي.
دغه پروژې ددې ولایت د کرنیزو محصولاتو مدیریت، د بڼوالو او بزګرانو د محصولاتو خوندي کولو او د دوی د عوایدو زیاتولو په پار پلي شوي دي.
