د فراه ولایت د کرنې نوی رییس معرفي شو

دکرنې، اوبولګولو او مالدارۍ وزارت د وړاندیز او د افغانستان اسلامي امارت د ریاست‌الوزراء د حکم پر بنسټ، مولوی پیرمحمد حلیمي د فراه ولایت د کرنې د رییس په توګه وګمارل شو او په رسمي ډول یې خپله دنده پیل کړه.
مولوی پیرمحمد حلیمی تر دې وړاندې د بادغیس ولایت د کرنې د رییس په توګه دنده ترسره کوله.
د ښاغلی حلیمی د پېژندنې په مراسمو کې د فراه مرستیال والي مولوي رحیم الله محمود، د لواء ارکان رییس آخندزاده عبدالسلام «ابوخالد»، د بادغیس ولایت برېښنا رییس مولوی خیرالله، د اطلاعات او کلتور رییس محمد عبدالحی سباوون، د فراه ښاروال مفتي سردار محمد مرصاد، د حج او اوقافو رییس فضل الرحمن مستغفر، د ښار جوړولو رییس نصرالله استقلال، د صنعت او سوداګرۍ رییس حافظ شمس الحق اجمل، مولوی بهلول مخلص او یوشمېر سیمه ییزو چارواکو کډون درلود.
د فراه مرستیال والي په خپلو خبرو کې وویل، چې ادلون بدلون د اسلامي امارت په نظام کې د شریعت یو مهم اصل دی او د همدې بنسټ پر اساس مولوی پیرمحمد حلیمی چې، مخکې یې د بادغیس د کرنې رییس په توګه کار کاوه، د فراه د کرنې رییس وټاکل شو.
هغه ټینګار وکړ چې مسؤلین باید د شریعت د رهنمودونو او اداري اصولو پر بنسټ په اخلاص دندې ترسره کړي څو خلکو ته اغېزمن خدمتونه ورسوي. نوموړی نوی رییس ته د ښه خدمت د توفیق غوښتنه وکړه.
وروسته د فراه د کرنې، ابولګولو او مالداری رییس مولوي پیرمحمد حلیمي وینا وکړه او د کرنې د سکټور د ودې او پراختیا په ټولو برخوکې د صادقانه کار ژمنه وکړه.
باید وویل شي، چې مولوي پیرمحمد حلیمي تر دې وړاندې د بادغیس ولایت د کرنې، اوبولګولو او مالدارۍ درییس په توګه دنده ترسره کوله.