لوګر کې د مېوو حاصلات د پام وړ ډېر شوي
۲۷ چنګاښ ۱۴۰۲ه.ش
۱ مُحَرَّمُ الحَرام ۱۴۴۵ه.ق
د لوګر د کرنې، اوبولګولو او مالدارۍ ریاست چارواکي وایي، چې د تېر کال په پرتله ددې ولایت د بڼونو د مېوو سږني حاصلات د پام وړ ډېر شوي دي.
د لوګر ولایت د کرنې، اوبولګولو اومالدارۍ ریاست د کرنیزو چوپړونو آمریت د بڼوالۍ مدیریت د معلوماتو له مخې سږ کال د دغه ولایت د مېوو په حاصلاتو کې د تېرکال په پرتله ۲۱ سلنه زیاتوالۍ راغلی دی.
دوی وایی تیرکال په ۳۹۱۷.۳ جریبه ځمکه مېوه کرل شوي وو چې ترې ۴۲۹۱۴.۵ ټنه حاصلات لاسته راغلي ؤ اوسږ کال په ۳۹۷۷.۳ جریب ځمکه کې مېوه کرل شوي، چې ترې ۴۷۶۲۷.۲ ټنه حاصلات تر لاسه شوي دي.
په همدې حال کې د لوګر بڼوال خوښ دي، چې سږ کال یې حاصلات ښه دي. دوی د ا.ا له مسؤولینو او مرستندویه موسسو غواړي تر څو ورسره لا زیاتې مرستې وکړي.
د لوګر دکرنې ریاست چارواکو په دې ولایت کې د مېوو په حاصلاتو کې د زیاتوالی لاملونه په دغه ولایت کې د کرنې او مالدارۍ ریاست له لوری دبڼوالۍ میکانیزه کولو برخه کې هڅې، د بڼوالو لاسنیوی او ورته د بڼوالۍ اړوند وسایلو وېشل ښودل شوی دی.
دا په داسی حال کې ده، چې د ا.ا له راتګ سره سم په دغه ولایت کې د کرنې او مالدارۍ ریاست له لوري ۷۰۰ جریبه مېوه لرونکي او بې مېوې ونو بڼوڼه احداث شوي دي.
