لوګر کې پر ۱۵۰ بزګرانو دسویابینو تخم او کیمیاوي سرو د وېش لړۍ پیل شوه
۷ غبرګولی ۱۴۰۲ه.ش
۸ ذو القعدة ۱۴۴۴ ه.ق
د لوګر ولایت د کرنې، اوبولګولو او مالدارۍ ریاست په هلو ځلو د خوړو او زده کړې نړیوالې «NEI» مؤسسې په مالي ملاتړ، ددې ولایت د مرکز پل علم ترڅنګ د محمدآغې او برکي برک ولسوالیو په ۱۵۰ تنو بزګرانو د سویابینو اصلاح شوي تخم او کیمیاوي سرو وېش لړۍ د مرکزپل علم څخه پیل شوه.
د لوګر دکرنې ریاست چارواکي وايي، چې یادو ۱۵۰ بزګرانو هر یوه بزګر ته شپږ کیلوګرامه دسویابینو اصلاح شوي تخم نهه کیلوګرامه توره سره او دوه نیم کیلوګرامه سپینه سره ورکول کېږي.
د یاد پروګرام په ترڅ کې ګټه اخیستونکو بزګرو ته د سویابینو د اقتصادي، طبیعي او غذایي ارزښت ترڅنګ، د کرلو، اوبو لګولو، د سرو استعمال اوخشاوې په هکله روزنه هم ورکړل شوې ده.
د یادونې وړ ده چې، د لوګر د کرنې ریاست ددې زمینه هم برابره کړې ده، ترڅو د یادي ځمکي څخه د سویابینو راټول شوي محصولات به بېرته د همدې موسسې له لارې له بزګرو څخه وپېرل شي.
د کرنې ریاست هڅه کوي، چې لوګر کې سویابین ترویج کړي او په راتلونکو کلونو کې دا لړۍ نوره هم وغځوي او د ولایت په کچه ترې ټول ځمکوال برخمن کړي.
سویابین بشپړه پروتیني او مغذي مواد لري، د کورنیو د روغتیا په ځانګړي ډول د ماشومانو د خوارځواکۍ په مخنیوي کې رغنده رول لري.
