د زمینداور کانال او موسی کلا د بند رغولو چارو د ارزونې په موخه د چارواکو ناسته
دکرنې، اوبولګولو او مالدارۍ وزارت د اوبو د پراختیا او ترویج رییس مولوي زین الدین حسام په مشرۍ ګډ پلاوی هلمند ته د سفر په ترڅ کې ددې ولایت دکرنې رییس او یوشمېر نورو چارواکو سره د زمینداور کانال او موسی کلا د بند رغولو چارو د ارزونې په موخه غونډه دائره کړه.
یاد پلاوي هلمند ته د خپل سفر موخه او هدف تشریح کړ او وې ویل چې« : د هېواد د اقتصادي شورا مرستیال په حکم ټاکل شوې ده د هلمند ولایت د زمینداور کانال او موسی کلا د بند رغولو چارې چې سروې یې مخکې تر سره شوي دي و ارزوي او په اړه یې لازم اجرائت ترسره کړي، همدارنګه په سیمه کې د کانونو څېړل او د اوبو د کمښت په اړه پر بدیلو لارو چارو غور کول یي د کاري سفر لومړیتوبونه دي».
د هلمند ولایت کرنې رییس مولوي نظرمحمد صدیقي راغلي پلاوي ته هر کلی ووایه او خوښي یې وښوده چې د هلمند په ولایت کې پر مهمو او بنیادي پروژو کار کېږي ترڅو ددې ولایت ځمکوال او ولسونه د ځان بسیاینې پر لور وخوځيږي.
ښاغلي صدیقي راغلي پلاوي ته ډاډ ورکړ چې اداره او مسلکي پرسونل به یې ددوی د کارونو په پرمختګ کې لازمه مرسته او همکاري کوي .
ورپسې د هلمند ولایت سندیزې حوزې، معادن او چاپېریال ساتنې ادارو رئیسانو په وارسره راغلي پلاوي سره معلومات شریک کړل او له خپلو اړخونو یې د همکاریو ډاډ ورکړ.
د یادونې وړ ده، چې د زمینداور د کانال او موسی کلا د بند جوړېدو سره به د سیمې اوسیدونکو ته په بېلابېلو برخو لکه د خلکو د اوبو د اړتیاوو پوره کول، د اوبو له ضایع کېدو څخه مخنیوی، له سیلابونو څخه مخنیوي، د برېښنا تولید، د لا ډېرو شاړو ځمکو خړوبول او کرکیلې ته برابرول، څښاک پاکو اوبو ته د خلکو لاس رسی زیاتول او د خلکو د ژوندانه د ښه کولو په برخوکې به اسانتیاوې برابرې شي، همدارنګه د زمینداور د کانال او موسی کلا د بند اړوندو ځمکو ته پر وخت اوبو رسول د حاصلات د کچې د ډېروالي او د کیفیت د ښه والي لامل هم کېږي. ددې تر څنګ د دغو پروژو پلي کول به مثبتې سیمه ییزې او ملي پایلي ولري، د زمینداور د کانال او موسی کلا بند جوړول به ګڼ کاري فرصتونه برابر کړي، او نږدې ۲۵۰۰۰ هکتاره ځمکه خړوبه کړي.
