ننګرهار کې د څه باندې ۷ میلیونه افغانیو په لګښت یوه پروژې ګټې اخیستنې ته وسپارل شوه
د ننګرهار د کرنې، اوبولګولو او مالدارۍ ریاست په هڅو د ملګرو ملتونو د پرمختیایي پروګرام (UNDP) د آبادۍ پروژې په مالي او د «DRC» مؤسسې په تخنیکي همکارۍ د دې ولایت د اچین په ولسوالی کې د کروندي د اوبخور په موخه د اوبولګولو د یوې پروژې د رغولو چارې بشپړ او ګټې اخیستنې ته وسپارل شوه.
د چارواکو په خبره ددې پروژې ټولیز لګښت ۷.۲ میلیونه افغانۍ ده، چې په ترڅ کې یې د اچین ولسوالی د باندر لوی کلي کې د 26 متره په اوږدوالي د اوبو سربند، 107 متره ویالې، 73 متره استنادی دېوال او 3 واړه چیک ډیمونه په اساسي ډول رغول شوي دي.
ددې پروژې په بشپړیدو سره 850 جریبه کرنیزې ځمکې ته د ابوخور زمینه برابره شوې ده.
د چارواکو په خبره د یادې پروژې د پلي کولو په لړ کې ۲۹۳ ځآیي اوسیدونکو ته د کار زمینه هم برابره شوې وه او له دې پروژې څخه نږدې درې زره کورنۍ برخمنې شوي دي.
د ننګرهار دکرنې ریاست چارواکو قومي مشرانو ته سپارښتنه هم وکړه، او زیاته یي کړه چې د رغول شوو پروژو څخه باید په سمه توګه ساتنه او مراقبت وکړي.
یادو چارواکو خلکو ته ډاډ هم ورکړ چې د ننګرهار د کرنې، اوبولګولو او مالدارۍ وزارت مشرتابه هڅه کوي تر څو د همکارو برنامو او موسساتو پر مټ بزګرانو او مالدارانو سره ښي مرستې ترسره کړي، او د بشري مرستو تر څنګ پرمختیايي پروژی هم پلي کړي.
