د هلمند ولایت دکرنې نوی رییس ددې ادارې کارکوونکو ته ور وپېژندل شول
دکرنې، اوبولګولو او مالدارۍ وزارت له خوا مولوي نظرمحمد صدیقي د هلمند ولایت دکرنې، اوبولګولو او مالدارۍ د نوي رییس په توګه تر ګمارنې وروسته ددې ریاست کارکوونکو ته وروپېژندل شو.
په دې اړه جوړه شوې غونډه کې د کرنې وزارت مالي او اداري مرستیال مولوی فضل الباري فضلي، د تمیز محکمې مسوول شیخ مولوی سردارمحمد، د هلمند د عدلیې رییس مولوی محمدي، د هلمند د استخباراتو رییس مولوی ناظم، مستوفي مولوی حمید الله رابطه، د کور او ښارجوړونې رییس مولوی معتصم او یوشمېر نورو علماوو او مشرانوګډون درلود.
دکرنې وزارت مالي او اداري مرستیال مولوی فضل الباري فضلي، نوی ګمارل شوی رییس ته د بریالیتوب هیله وکړه او له هغه څخه یې وغوښتل، چې د خپلو چارو په ترسره کولو کې نه ستړې کېدونکي هلې ځلې وکړي.
ښاغلی فضلي د هلمند دکرنې مخکنی رییس خدمتونه وستایل او په نوې دنه کې ورته د لازیاتو خدمتونو د توفیق د غوښتنې ترڅنګ وویل: «په اداراتو کې تغییر او تبدل د چارو د لا سمښت او بهبود په موخه ترسره کېږي.»
د کرنې وزارت مالي او اداري مرستیال فضل الباري فضلي دغه راز په خپلو خبرو کې وویل: «د مشرانو د لزوم دید له مخې د هلمند د کرنې مخکنی رییس مولوی شهاب الدین د کرنې وزارت د ځمکو ادارې د لوی رییس په توګه ګمارل شوی دی او مخکنی رییس، چې مخکې د ځمکو چارو رییس و د هلمند دکرنې رییس په توګه ګمارل شوی دی.»
په دې غونډه کې د تمیز محکمې مسوول شیخ مولوی سردارمحمد په خپلو خبرو کې له ټولو کارکوونکو څخه د یووالی او اتفاق غوښتنه وکړه او ویې ویل، چې ټول باید په اتحاد او اتفاق سره مسلمانانو ته چوپړتیاوې وړاندې کړي.
په همدې حال کې د هلمند دکرنې، اوبولګولو او مالدارۍ نوی رییس مولوی نظرمحمد صدیقي په خپلو خبرو کې وویل، چې د هلمند ولایت د کرنې ریاست ته راتګ یو مسؤلیت ګڼم، په خپل ټول توان، هڅو او د مشرانو په مشوره به د هلمند ولایت د بزګرانو، بڼوالو او مالدارانو لپاره خدمت کوم .
