لغمان کې په ۱۳۰ مېرمنو د سبو او مېوو د پروسس کېټونه ووېشل شول
د لغمان دکرنې، اوبولګولو او مالدارۍ ریاست د ملګرو ملتونو پراختیایي ادارې (UNDP) په مالي او د (Roots Of Peace) مؤسسې په تخنیکي همکارۍ ددې ولایت پر ۱۳۰ اړمنو مېرمنو د سبو او مېوو د پروسس ۱۶ ډوله بېلابېل توکي وېشلي دي.
په دې اړه جوړه شوې غونډه کې د لغمان دکرنې، اوبولګولو او مالدارۍ رییس الحاج مولوی محمدولي محسن د یادو ادارو له مرستو او همکاریو څخه مننه وکړه او دغه راز له دغو مرستو برخمن شويو مېرمنو ته لازمې لارښوونې وکړې.
له دغو مرستو برخمن شوي مېرمنې د سبو او مېوو د پروسس له یادو توکو څخه په ګټنې په خپلو کورونو کې اچار، مربا، رُب او یوشمېر نور توکي پروسس او بازار ته وړاندې کوي او له دې لارې خپلو کورنیو ته حلاله نفقه ترلاسه او د خپلو کورنیو اقتصادي پیاوړتیا په برخه کې همکارۍ کوي.
ددې مرستې موخه د بېوزله او اړمنو مېرمنو ملاتړ او د دوی اقتصادي پیاوړتیا سره مرستې او همکارۍ کول دي.
