د ننګرهار دکرنې ریاست: د کرنې میکانیزه کولو په موخه ناسته وشوه
۳ لړم ۱۴۰۱ه.ش
۲۹ ربیعالاول ۱۴۴۴ ه.ق
د ننګرهار د کرنې، اوبولګولو او مالدارۍ رییس مولوی عبدالستار محمد نن د خپل کار په دفتر کې د اطریش هېواد د کریټاس مؤسسې د بدیل معیشت برخې مسؤل توماس پرینتل او د هالنډ هېواد د کورډیډ مؤسسې د بېړنیو مرستو د برخې مسؤل پرشات شامغولې سره وکتل.
دغه پلاوی چې د افغانستان لپاره د کلیو د بیا ودانولو یا (RRAA) مؤسسې عمومي مسؤل، د کورډیډ مؤسسې عمومي مسؤل او ولایتي مسؤل یي ملتیا کوله ننګرهار ولایت ته په دي موخه راغلي ول، چې دي ولایت کې د کرنې او مالدارۍ برخي وضعیت وڅېړي او د راتلوونکې لپاره د کرنې میکانیزه کولو په موخه منظم پلان ترتیب او مؤثرې پروژې پلې کړي.
د ننګرهار دکرنې رییس مولوی عبدالستار محمد په ننګرهار ولایت کې د کرنې او مالدارۍ برخه کې د لاسته راوړنو او پلي شوو پروژو په اړه رڼا واچوله او زیاته يي کړه چې په تېر یو کال کې کروندګرو ته د همکارو برنامو او مؤسساتو په همکارۍ د غنمو، شولو او سبو اصلاح شوي تخمونه، کیمیاوی سرې او همداراز بڼوالانو ته اصلاح شوي نیالګې وېشل شوي دي.
مالدارانو ته د څارویو معیارې خوراکه وېشل شوي او د څارویو د مختلفو ناروغیو د مخنیوي په موخه واکسین تطبیق او د وقایي لپاره درمل او عامه پوهاوي هم ورکول شوي دي.
محمد د اوبولګولو په برخه کې یادونه وکړه چې په یو شمېر ولسوالیو کې د همکارو مؤسسو او د کار په بدل کې د غنمو د ورکړي پروژی له لوري کروندګر ته د اوبخور او د اوبو د ښه مدیریت په موخه سربندونه، کانالونه، ویالې او ورښونه جوړ شوي، هغه زیاته کړه چې د کار په بدل کې د غنمو د ورکړې پروژې له طریقه په سلګونه متره سرکونه هموار او ګټې اخستنې ته سپارل شوي دي.
محمد زیاته کړه چې د کرنې میکانیزه کولو لپاره اړینه ده چې کروندګرو ته د بشري مرستو تر څنګ باید د کرنې برخه کې نوي تکنالوژۍ وروپېژندل شي، اصلاح شوي تخمونه او کیمیاوي سرې او همدارنګه کرنیز توکې په واک کې ورکړل شي.
د حصارک، هسکه مېنه، شېرزاد، خوګیاني، پچیراګام او یو شمېر نورو ولسوالیو په تنګیو کې د موسمي اورښتونو د اوبو زېرمه کولو لپاره چکډیمونه او سربندونه باید جوړ شي تر څو د اوبو د ضایعاتو او د خاورې د تخریب مخنیوي وشي او کروندګر وکولاې شي، چې د اوبخور لپاره په هر موسم کې اوبو ته لاس رسي ولري.
