ننګرهار: دره نور کې په ۱۰۰۰ کروندګرو د غنمو اصلاح شوي تخم او کیمیاوي سرې ووېشل شول
۲۶ تله ۱۴۰۱ه.ش
۲۲ ربیعالاول ۱۴۴۴ ه.ق
د ننګرهار د کرنې، اوبولګولو او مالدارۍ ریاست په هلو ځلو د ملګرو ملتونو د خوړو او کرنې ادارې (FAO) په مالي لګښت او د اکشن آیډ موسسې په تخنیکي همکارۍ د دې ولایت د دره نور په ولسوالی کې ۱۰۰۰ تنه کروندګرو ته ۵۰ ټنه د غنمو اصلاح شوي تخمونه، ۵۰ ټنه DAP او ۵۰ ټنه یوریا کیمیاوي سرې چې هر بزګر ته ۵۰ – ۵۰ کیلو سهم رسېدلی وه، د یوي غونډې په ترڅ کې وویشل شول.
د یادو غنمو او کیمیاوي سرو د وېش پر مهال د ننګرهار دکرنې ادارې رییس مولوی عبدالستار محمد د د ملګرو ملتونو دخوړ او کرنې ادارې (FAO) سیمه ییز دفتر څخه په منني سره وویل، چې د FAO دفتر تل د بزګرانو سره نه ستړي کیدونکې مرستې ترسره کړيدي او تمه ترې کیږي، چې په راتلوونکې کې هم د دي ولایت بزګرانو او مالدارانو سره پوره همکارې وکړي.
ښاغلی محمد د اصلاح شوو تخمونو د اهمیت په اړه رڼا واچوله او زیاته يي کړه، چې باید ټول په خپلو ځمکو کې اصلاح شوي تخمونه وکرو تر څو په کم مصرف او کمې ځمکې څخه زیاته حاصل واخلو.
د یادونې وړ ده، چې د وېش پر مهال د ملګرو ملتونو د خوړو او کرنې اداې (FAO) د سیمه ییز دفتر مسؤل، د دره نور ولسوالی ولسوال، د کرنې مسؤلین، د اکشن آیډ موسسې سیمه ییز مسؤل او یو شمېر قومي مشرانو ګډون درلود.
