د هلمند موسی کلا ولسوالۍ کې پر ۱۷۰ کسانو نقدې پيسې او کرنيز توکي ووېشل شول
۱۱ زمری ۱۴۰۱ه.ش
۴ محرم الحرام ۱۴۴۴ ه.ق
د هلمند د کرنې، اوبولګولو او مالدارۍ ریاست وايي چې ددې ولايت د موسی کلا ولسوالۍ پر ۱۷۰ اوسېدونکو نقدې پيسې او بېلابېل کرنيز توکي وېشل شوي دي.
د هلمند دکرنې رياست چارواکي وايي: "دهلمند ولایت موسی کلا ولسوالی نږدې ١٧٠ تنو ځايي اوسیدونکو ته چې ددرېوو کانالونو پاکولو چارې یې د ١٠ ورځو په جریان کې سرته رسولي دي، د کار په بدل کې هر نفر ته ٣٥٠٠ افغانیو وېشلو پروسه پای ته ورسېده".
د یادو کسانو د کار په پایله کې ددرېوو فرعي کانالونو پاکولو چارې سرته رسیدلي دي چې له لارې یې شاخوا ٣٨٣ هکټاره کرنیزه ځمکه خړوبېږي چې د سیمې بزګرو او ځمکوالو ته یې ګڼې اسانتیاوې رامنځته کړي.
همدارنګه د بېړنيو حالاتو پر وخت د چمتوالي په موخه د دټو جوړو شوو کمېټو غړو سره د اړتیا وړ کرنیزو توکو مرسته هم ترسره شوه، تر څو د ضرورت په وخت کې ورڅخه د یادې ولسوالۍ په اړونده سیمو کې ګټه واخيستل شي.
ددې پروسې مالي چارې د ژغورنې نړیوال پروګرام یا (IRC) په همکارۍ تمویل شوي دي چې، دکرنې ریاست ترڅنګ د سیمې د مسؤلو ادارو سره په پوره همغږۍ پای ته ورسېدلې.
په ورته وخت کې د سیمې علماء کرامو، قومي مشرانو او ګڼو ولسي وګړو سره د اړونده مسؤلینو لخوا ناسته وسوه، هغوی د هلمند د کرنې ادارې تر څنګ د ټولو مسؤلینو څخه مننه وکړه چې په دې برخه کې یې لاسنیوی وکړ او غوښتنه یې وکړه چې دې ډول مرستو ته دې دوام ورکول شي او د پاتې یوه مهم کانال پاکولو چارې دې هم پیل شي.
