د شاتو مچیو نړیواله ورځ؛ د شاتو له ټمبګو دوه زره او ۵۰۰ ټنه شات راټول شوې
۳۰ غویی ۱۴۰۰
د ملګرو ملتونو عمومي ټولنه، د شاتو مچیو د اهمیت په برخه کې د عامه پوهاوي، د شاتو مچیور روزنې ملاتړ او د خوړو تامین او د کرنې د تلپاتې پراختیا په برخه کې د شاتو مچیو اغېرې په پار، د غویي ۳۰ مه د شاتو مچیو نړیواله ورځ نومولی دی.
د کرنې، اوبولګولو او مالدارۍ وزارت د اطلاعاتو رییس او ویاند اکبر رستمي وایي، چې د وروستیو کلونو په ترڅ کې د شاتو د تولید کچه لوړه شوې ده او دتېر لمریز کال په ترڅ کې د هېواد په مرکز او لایتونو کې دوه زره او ۴۹۰ مټریک ټنه شات تولید شوي دي.
د هغه په خبره، پکتیا د ۸۹۹ ټنه شاتو په تولید سره د نومړل په سر کې او ورپسې ننګرهار د ۵۰۰ ټنو او خوست د ۴۱۶ ټنو په تولید سره په هېواد کې د شاتو تر ټولو مهم تولیدوونکي دي.
دغه راز هرات، لغمان، بدخشان، کندز او بامیان هم د شاتو د تولید په برخه کې د لویو تولیدوونکو ولایتونو په ډله کې دي.
د کرنې وزارت ویاند وویل، چې دمګړۍ په هېواد کې د شاتو مچیو روزنې شپږ زره او ۷۵۷ فارمونه شتون لري، چې ډېری یې د بادغیس، هرات، بدخشان، پکتیا، کندز، دایکندي، بامیان، لوګر، سرپل، فراه، میدان وردګ، کاپیسا، تخار، بغلان او خوست ولایتونو کې دي.
ښاغلی رستمي وویل، چې بادغیس د ۷۲۲ فارمونو، هرات د ۵۹۳، پکتیا د ۵۵۰ او بدخشان د شاتو مچیو د ۵۲۶ فارمونو په درلودو سره د شاتو مچیو روزنې د فارمونو په برخه کې د جدول په سر کې دي.
د شاتو مچیو روزنه د یو ښه عاید لرونکي دندې په توګه د پراختیا په حال کې ده، چې محصولات یې ښه کورني او بهرني بازار لري.
په کورنیو بازارونو کې د شاتو نوعیت ته په کتو یوکیلو خالص شات له ۵۰۰ تر دوه زره افغانیو خرڅېږي.
دا په داسې حال کې ده، چې په ۱۳۹۸یم کال د شاتو د تولید کچه دوه زره او ۱۰۰ ټنه وه، چې دا شمېره په ۱۳۹۹یم کال کې ۳۹۰ ټنه زیاتوالی لري.
