ننګرهار کې د مالدارۍ سکټور د غوړېدا په پار هڅې
۶ لیندۍ ۱۳۹۹
د ننګرهار د کرنې، اوبولګولو او مالدارۍ ریاست چارواکي وایي، چې د مالدارۍ سکتور د پراختیا په پار یې هڅې پیل کړي دي، چې ورځ تر بلې یې وضعیت په ښه کېدو دی.
د ننګرهار د کرنې ریاست وایي، چې ددې ولایت په مرکز او ولسوالیو کې د مالدارانو وړتیا لوړولو په پار دوی ته په بېلابېلو برخو کې روزنیزې برنامې په لاره اچول، د مالدارۍ په اسټیشنونو کې مصنوعي القاح ترسره کول، څارویو ته د برسلوز او نورو ناروغیو د واکسینونو پروګرام پلي کول، د څارویو د ناروغیو او افتونو دمخنیوي په پار د درملو وېش، د څارویو د عامه ساتن ځایونو دواپاشي، د اړوندو توکو وېش، په حیواني محصولاتو او درملو کنټرول او څارنه هغه څه دي، چې د ننګرهار د کرنې ریاست لخوا راون ۱۳۹۹ یم کال کې مالدارنو ته د ښو خدمتونو په پار ترسره شوي دي.
ددې ترڅنګ د ننګرهار د کرنې ریاست او همکارو موسسو لخوا په ننګرهار کې د مالدارۍ سکتور د پیاوړتیا په موخه ګڼې برنامې پلي شوي چې، د لبنیاتو د پروسس ټولنې او د شېدو راټولو مرکزونه جوړول او په یادو برخو کې د اړوندو توکو وېش او د خصوصي سکټور ملاتړ په کې شامل دي، چې ددې ولایت د مالدارۍ سکټور د پراختیا په پار تر سره شوي دي.
د دغو برنامو په پلي کېدو سره د مالدارۍ سکټورخوندي، د ناروغیو کچه ټیټه او د څارویو محصولات ډېر شوي دي.
