د کرنې وزارت د بڼوالۍ او مالدارۍ ملي پروژه بڼوال او بزګرانو ته کرونا سره د مبارزې په هکله پوهاوی ورکوي
۲۲ غویی ۱۳۹۹
د کرنې وزارت د بڼوالۍ اومالدارۍ ملي پروژه، چې د هېواد په ۳۴ ولایتونو کې فعالیت کوي، له تېرو دوو میاشتو را په دې خوا د کوویډ-۱۹ یا کرونا ویرس څخه د مخنیوي او د بدن د دفاعي سیسټم د پیاوړتیا د لارې چارې په هکله بزګرانو او بڼوالو ته د پوهاوی کمپاین په لاره اچولی دی.
د کرنې وزارت د بڼوالۍ او مالدارۍ ملي پروژې «NHLP» له خوا د هېواد په ۳۴ ولایتونو کې نارینه او ښځینه کروندګرو او مالدارانو ته د روغتیایي سپارښتنو په رعایت سره په ګروپونو کې د کرونا سره د مبارزې لارې چارې ښیي.
یاد کاري ګروپونه، تر دې مخکې ددې پروژې له خوا د بڼوالۍ او مالدارۍ د پراختیا د فعالیتونو د پلي کېدو په پار جوړ شوي ول.
یاده پروژه د نړیوال روغتیایي سازمان او د هېواد د عامې ورغتیا وزارت له لارښوونو په استفادې سره یو شمېر پیغامونه جوړ کړي دي او دغه پیغامونه په چاپي او غیر چاپي بڼه پر بڼوالو او مالدارانو وېشي. د عامه پوهاوی دغه کمپاین د مخکښو بزګرانو او مالدارانو او د حیواني روغتیا واحدونو له لارې کلیوالو خلکو ته رسول کیږي.
ددې کمپاین په پیغامونو کې ویل شوي دي، چې خلک د خپل بدن د دفاعي سیسټم د پیاوړتیا په پار کوم، سابه، مېوې او حیواني محصولات وخوري؛ څنګه خپل خواړه پاک وساتي او په خپلو چارو کې باید کوم ټکي رعایت کړي او کوم روغتیایي سپارښتنې په پام کې ونیسي.
