بادغیس کې پر ۷۸۰۰ بزګرانو د غنمو د اصلاح شویو تخمونو او کیمیاوي سرو د وېش لړۍ پیل شوه
۷ لړم ۱۴۰۵ هـ.ش
۱۷ جُمَادَى الأول ۱۴۴۸ هـ.ق
د بادغیس ولایت د کرنې، اوبو لګولو او مالدارۍ ریاست په همغږۍ او د «هلپ جرمني» او «رازي» مؤسسو په مالي ملاتړ، د دغه ولایت په پنځو ولسوالیو او مرکز کې پر ۷۸۰۰ مستحقو بزګرانو د غنمو د اصلاح شویو تخمونو او کیمیاوي سرو د وېش لړۍ پیل شوه.
د دغه پروګرام له مخې، د بادغیس ولایت د قادس، بالامرغاب، مقر، غورماچ او سنګآتش ولسوالیو او د ولایت د مرکز اړوند بزګرانو ته د غنمو اصلاح شوي تخمونه او کیمیاوي سرې وېشل کېږي، څو د کرنیزو فعالیتونو د پیاوړتیا، د غنمو د حاصلاتو د زیاتوالي او د بزګرو کورنیو د اقتصادي وضعیت په ښه والي کې مرسته وشي.
د معلوماتو له مخې، د دغه پروګرام هر ګټه اخیستونکي بزګر ته د کرنیزو مرستو په یوه بسته کې ۵۰ کیلوګرامه د غنمو اصلاح شوي تخمونه، ۵۰ کیلوګرامه توره سره او ۵۰ کیلوګرامه سپینه سره ورکول کېږي.
ټاکل شوې ده، چې د یاد پروګرام په بشپړېدو سره به په ټولیز ډول ۳۹۰ مټریک ټنه د غنمو اصلاح شوي تخمونه، ۳۹۰ مټریک ټنه توره سره او ۳۹۰ مټریک ټنه سپینه سره، چې ټولټال ۱۱۷۰ مټریک ټنه کرنیز توکي کېږي، پر ټاکل شویو بزګرانو ووېشل شي.
د دغو کرنیزو توکو د وېش بهیر د اړوندو ولسوالیو د کرنیزو خدمتونو مدیریتونو د کارکوونکو تر څارنې لاندې ترسره کېږي، څو مرستې په منظم او رڼا ډول مستحقو بزګرانو ته ورسېږي او د وېش په بهیر کې لازمې همغږۍ او څارنې ته پاملرنه وشي.
د دغه پروګرام اساسي موخه د بزګرانو ملاتړ، د اصلاح شویو تخمونو دودول، د کرنیزو کښتونو د کیفیت ښه والی، د غنمو د تولید زیاتوالی او د بزګرو کورنیو د اقتصادي او معیشتي وضعیت پیاوړتیا ده.
د بادغیس ولایت د کرنې، اوبو لګولو او مالدارۍ ریاست د همکارو مؤسسو له ملاتړ څخه د هرکلي ترڅنګ، د کرنیزو خدمتونو پراختیا، د بزګرانو لاسنیوی او د کرنیزو محصولاتو د زیاتوالي په برخه کې د دا ډول پروګرامونو پلي کول مهم بولي.
د یادونې وړ ده، چې د کرنې، اوبو لګولو او مالدارۍ وزارت د هېواد په بېلابېلو ولایتونو کې د همکارو کورنیو او نړۍوالو مؤسسو په همغږۍ، د اصلاح شویو تخمونو، کیمیاوي سرو او نورو اړینو کرنیزو توکو د وېش پروګرامونه پلي کوي، څو بزګران معیاري کرنیزو توکو ته لاسرسی ومومي، د کرنیزو حاصلاتو کیفیت او کمیت لوړ شي او د هېواد د خوړو خوندیتوب او کرنیزه ځانبسیاینه پیاوړې شي.
بادغیس د هېواد له هغو ولایتونو څخه دی، چې کرنه او مالداري یې د ګڼ شمېر اوسېدونکو د ژوند او عاید مهمې سرچینې جوړوي. په دغه ولایت کې د اصلاح شویو تخمونو او کیمیاوي سرو وېش، په ځانګړي ډول د غنمو د کرکیلې لپاره، کولای شي د بزګرانو د تولیدي وړتیاوو په لوړولو، د کرنیزو حاصلاتو په زیاتوالي، د کلیوالو کورنیو د اقتصادي وضعیت په ښه والي او د کرنیز اقتصاد په پیاوړتیا کې اغېزمن رول ولوبوي.
