بغلان کې د خټکیو او هندواڼو په حاصلاتو کې ۱۵ سلنه زیاتوالی؛ سږ کال له ۱۵۹ زره مټریک ټنو ډېر حاصل ترلاسه کېږي
۲۱ چنګاښ ۱۴۰۵ هـ.ش
۲۶ مُحَرَّمُ الحَرام ۱۴۴۸ه.ق
د بغلان ولایت د کرنې، اوبو لګولو او مالدارۍ ریاست وایي، د روان کال په ترڅ کې په دې ولایت کې د خټکیو او هندواڼو په حاصلاتو کې د تېر کال په پرتله د پام وړ زیاتوالی راغلی، چې د اصلاح شویو کرنیزو لارو چارو او د کروندګرو د هڅو څرګندونه کوي.
د یاد ریاست د شمېرنو له مخې، سږ کال په بغلان ولایت کې پر ۵ زره او ۵۰ هکټاره ځمکه خټکي او هندواڼې کرل شوې دي، چې اټکل کېږي له دغو کروندو څخه به ۱۵۹ زره او ۷۵ مټریک ټنه حاصل ترلاسه شي.
د معلوماتو له مخې، تېر کال په بغلان کې پر ۴ زره او ۶۵۸ هکټاره ځمکه خټکي او هندواڼې کرل شوې وې، چې ټولیز حاصل یې ۱۳۸ زره او ۱۲۴ مټریک ټنه و. د دواړو کلونو د شمېرنو پرتله ښيي چې سږنی تولید د تېر کال په پرتله شاوخوا ۱۵ سلنه زیات شوی دی.
د بغلان د کرنې ریاست مسلکي کارکوونکي د دې زیاتوالي عمده لاملونه د اصلاح شویو تخمونو او کیمیاوي سرو کارول، د کرنې د ترویجي خدمتونو پراختیا، د کښت د نوې او معیاري طریقو دودول، د نباتي آفتونو او ناروغیو اغېزمن کنټرول او د کروندو د ساحې پراخېدل بولي.
بغلان د هېواد له هغو مهمو کرنیزو ولایتونو څخه دی، چې د مناسب اقلیم، حاصلخېزې خاورې او د اوبو د نسبي شتون له امله پکې د خټکیو او هندواڼو لوړ کیفیت لرونکي محصولات تولیدېږي. د دې ولایت خټکي او هندواڼې د خپل ځانګړي خوند او کیفیت له کبله د هېواد په بازارونو کې ځانګړی شهرت لري.
د یادونې وړ ده، چې په بغلان ولایت کې د خټکیو او هندواڼو ډېره کرنه د ولایت په مرکز او همدارنګه د ډنډغوري، دهنهغوري، بغلان مرکزي او دوشي ولسوالیو کې ترسره کېږي، او هر کال د دغو سیمو زرګونه بزګران د دغو محصولاتو له تولید او پلور څخه خپل عاید ترلاسه کوي.
