شپږو ولایتونو کې د کرنې او مالدارۍ پروژو د پلي کولو هوکړهلیک لاسلیک شو
۲۳ غویی ۱۴۰۵ه.ش
۲۶ ذُو ٱلْقَعْدَةِ ۱۴۴۷ه.ق
د کرنې، اوبو لګولو او مالدارۍ وزارت د پلان او پروګرامونو د همغږۍ لوی رییس مولوي عبدالغفور او د افغان اېډ مؤسسې د پروګرامونو مسؤل عبدالرحمن طارق ترمنځ د ۱.۸ میلیونه ډالرو په ارزښت هوکړهلیک لاسلیک شو.
یاد هوکړهلیک د کرنې وزارت د پلان او پروګرامونو د همغږۍ لوی ریاست په دفتر کې لاسلیک شو، چې له مخې به یې د هېواد په شپږو ولایتونو کې لسګونه کرنیزې او مالدارۍ پروژې پلې شي.
د هوکړهلیک د لاسلیک په مراسمو کې مولوي عبدالغفور د پروژو پر اغېزمن، شفاف او باکیفیته تطبیق ټینګار وکړ او ویې ویل، ټول پروګرامونه باید د اسلامي امارت له پالیسۍ سره سم عملي شي.
همداراز، د افغان اېډ مؤسسې د پروګرامونو مسؤل عبدالرحمن طارق ډاډ ورکړ، چې د دې ادارې پروژې به د ټاکل شویو معیارونو له مخې پلې کېږي او موخه یې د بزګرانو او مالدارانو د ژوند ښه کول دي.
دغه پروژې د اروپایي ټولنې په مالي ملاتړ د سمنګان، بدخشان، غور، دایکنډي، جوزجان او تخار ولایتونو په ۱۲ ولسوالیو کې عملي کېږي.
د یادو پروژو فعالیتونه د کورنیو ملاتړ، د چرګانو وېش، له مالدارانو سره مرسته، د شنوخونو جوړول، د اوبو مدیریت، د غوړیو د پروسس فابریکو تجهیز او تمویل، د واټرشیډ پروګرامونه، او بزګرانو او مالدارانو ته د مرستندویه بستو وېش دي.
