پکتیکا کې د چرګانو فارمونو ملاتړ؛ د کلیوالو عایداتو د لوړولو لپاره مهم ګام
۱۰ غویی ۱۴۰۵ه.ش
۱۳ ذُو ٱلْقَعْدَةِ ۱۴۴۷ه.ق
د پکتیکا ولایت د کرنې، اوبو لګولو او مالدارۍ ریاست په همکارۍ، د «افجياې» مؤسسې له لوري د کلیوالي معیشت د ښه والي او د اقلیمي بدلون پر وړاندې د پایښت د ابادۍ ستراتیژۍ په چوکاټ کې، د خلکو د ژوند د ښه کېدو او دوامدارو عایداتي فرصتونو د رامنځته کولو په موخه عملي ګامونه اخیستل شوي دي.
د همدې پروګرام په لړ کې، د مټاخان ولسوالۍ کې د چرګانو د څلورو فارمونو لپاره، چې له وړاندې یې سروې ترسره شوې او مستحق کسان ټاکل شوي وو، د فارم جوړولو اړوند اړین وسایل پر یادو مستحقینو ووېشل شول.
یاد وسایل «افجياې» مؤسسې له خوا برابر شوي وو او د اړوندو مسؤلینو په حضور کې ګټهاخېستونکو ته وسپارل شول، څو هغوی وکولای شي د چرګانو د روزنې له لارې خپل عاید زیات او اقتصادي وضعیت پیاوړی کړي.
د دې پروژې اساسي موخه د کلیوالو کورنیو اقتصادي پیاوړتیا، د کارموندنې فرصتونو رامنځته کول او د اقلیمي بدلونونو پر وړاندې د پایښت لرونکو معیشتي لارو چارو دودول دي.
د پکتیکا د کرنې، اوبو لګولو او مالدارۍ ریاست ټینګار کوي، چې د خلکو د هوساینې او اقتصادي ودې لپاره به دا ډول پروګرامونه په دوامداره توګه پلي کېږي.
