د بزګر مېله او د کرنیزو او مالدارۍ محصولاتو څلور دېرشم نندارتون بریالۍ ترسره شوه
۷ غویی ۱۴۰۵ه.ش
۱۰ذُو ٱلْقَعْدَةِ ۱۴۴۷ه.ق
د بزګر مېله او د کرنیزو او مالدارۍ محصولاتو څلور دېرشم نندارتون، چې د افغانستان اسلامي امارت د کرنې، اوبو لګولو او مالدارۍ وزارت په نوښت د کابل په بادامباغ کې جوړ شوی و، له څلورو ورځو بریالي ترسره کېدو وروسته پای ته ورسېد.
دغه نندارتون د هېواد له بېلابېلو سیمو څخه د کروندګرو، مالدارانو، صنعتکارانو او سوداګرو په پراخ ګډون ترسره شو، چې په ترڅ کې یې سلګونه ډوله کرنیز او مالدارۍ محصولات، پروسس شوي تولیدات، لاسي صنایع، کرنیز ماشینونه، زعفران، طبي بوټي او عصري وسایل نندارې ته وړاندې شول. همدارنګه، د لاسي صنایعو لپاره، په ځانګړي ډول د ښځو تولیداتو ته لسګونه غرفې هم ځانګړې شوې وې.
د دې نندارتون د جوړېدو موخه د ملي اقتصاد پیاوړتیا، د کورنیو تولیداتو ملاتړ، د بازارموندنې زمینه برابرول، له کورنیو او بهرنیو بازارونو سره د تولیدوونکو نښلول او د کرنې او مالدارۍ په سکتور کې د پانګونې هڅونه بلل شوې وه، چې تر ډېره بریده دا موخې ترلاسه شوې دي.
د وړاندې شویو معلوماتو له مخې، د نندارتون په ترڅ کې ټولټال ۹ ژمنې د شاوخوا ۷ میلیونه او ۸ زره افغانیو په ارزښت، ۲۰ هوکړهلیکونه د شاوخوا ۳۰۰ میلیونه او ۷ زره افغانیو په ارزښت او ۲۹ قراردادونه د شاوخوا ۴۰ میلیونه او ۱۱ زره افغانیو په ارزښت ثبت شوي دي. همدارنګه، د پلور عمومي کچه ۲ میلیونه او ۶۷۹ زره او ۵۱ افغانیو ته رسېدلې ده، چې دا د کرنې او مالدارۍ په سکتور کې د اقتصادي راکړې ورکړې د پام وړ زیاتوالی ښيي.
دغه لاسته راوړنې په ټولیز ډول د راکړې ورکړې د کچې لوړوالی، د سوداګریزو اړیکو پراختیا او د هېواد د کروندګرو او مالدارانو لپاره د نویو فرصتونو رامنځته کېدل څرګندوي.
د کرنې، اوبو لګولو او مالدارۍ وزارت د دې ډول پروګرامونو پر دوام ټینګار کړی او ژمنه یې کړې، چې د تولید څخه تر بازار پورې د ارزښت ځنځیر په پیاوړتیا سره به د کرنې سکتور دوامداره وده او د کروندګرو او مالدارانو اقتصادي وضعیت لا ښه کړي.
