لغمان کې ۱۷۵ کورنیو ته د سبو او مېوو د پروسس توکو ویش لړۍ پیل شوه
د لغمان د کرنې، اوبولګولو او مالدارۍ ریاست تر چتر لاندې، د نه انلوس مؤسسې په تخنیکي همکارۍ او د ایټالیوي ټولنې په مالي ملاتړ، د مرکز مهترلام اړوند ۱۷۵ مستحقو کورنیو ته د سبو او مېوو د پروسس لس قلمه وسایل ووېشل شول.
په مرسته کې هرې کورنۍ ته د جوسر ماشین، کاشوغه، دیګ، چاقو، ګازي ډبې، ګازي نغري، جالۍ، وزن کولو تلې او نورو اړوندو توکو بسته ورکړل شوه.
د مرستو د وېش لړۍ د لغمان د کرنې رییس مولوي عبدالستار محمد، د اقتصاد رییس مولوي جان محمد حامد، د کرنیزو چارو آمر انجینر بریالی همدرد، او د نه انلوس مؤسسې د مسؤلینو په حضور کې پرانیستل شوه.
په مراسمو کې د لغمان دکرنې رییس مولوي عبدالستار محمد د پروسس شوو توکو پر ارزښت خبرې وکړې او یاد وسایل یې د کرنیزو تولیداتو د ضایع کېدو د مخنیوي او د بزګرانو د اقتصادي پیاوړتیا لپاره مهم وبلل. نوموړي له مستحقینو وغوښتل، چې له ورکړل شوو وسایلو څخه په سالم، معیاري او دوامدار ډول ګټه واخلي، څو د کورنیو اقتصادي وضعیت ښه او بې روزګاره کسانو ته د کار زمینه برابره شي.
په ورته وخت کې د لغمان د اقتصاد رییس مولوي جان محمد حامد د نه انلوس مؤسسې له مسؤلینو مننه وکړه، چې د کورني اقتصاد د پیاوړتیا په برخه کې هڅې کوي. حامد له یادې مؤسسې وغوښتل، چې دغه ډول مرستې دې یوازې مهترلام پورې محدودې نه شي، بلکې د ولایت ټولو ولسوالیو ته دې پراخې شي. نوموړي له برخهاخیستونکو هم وغوښتل، چې له ورکړل شوو وسایلو سالمه استفاده وکړي.
