د ننګرهار د کرنې رییس د نه انلوس مؤسسې مشرې سره وکتل
۸ غویی ۱۴۰۴ ه.ش
۳۰ شَوّالُ المُکَرَّم ۱۴۴۶ه.ق
د ننګرهار د کرنې، اوبو لګولو او مالدارۍ رییس مولوي محمد ولي محسن د خپل کار په د فتر کې د نه انلوس مؤسسې له مشرې سوزانا او نورو همکارانو سره په ننګرهار کې د کرنې او مالدارۍ په برخه کې د اړتیا پر اساس پروژو ډیزاین کولو، روانو او راتلوونکوفعالیتونوپه موخه وکتل.
د ننګرهار د کرنې، اوبو لګولو او مالدارۍ رییس مولوي محمد ولي محسن په دې کتنه کې د ایټالیا هېواد او خلکو د مرستو څخه د مننې ترڅنګ خپلې غوښتنې، وړاندیزونه او راتلوونکي پلانونه د مؤسسې له مسؤلینو سره شریکه کړه.
ښاغلي محسن له آغلې سوزانا څخه په ننګرهار کې د ځنګلونو بیا رغولو، جلغوزیو، چهارمغزو او بېرو ځنګلونو د کرلو غوښتنه وکړه.
نوموړې همدارنګه د سړوخونو، شنوخونو جوړولو، بڼوالۍ، چکډېمونو جوړولو، اصلاح شوي تخمونو، خوسکیو او وزو وېش، واکسینونو او نورو برخو کې د همکاریو غوښتنه هم وکړه.
د ننګرهار دکرنې رییس دمؤسسې مسؤلینو ته په ټولو قانوني برخو کې د همکارۍ او همغږۍ ډاډ ورکړ.
په همدې حال کې، د نه انلوس مؤسسې مسؤله سوزانا د ننګرهار د کرنې رییس د رغنیزو پلانونو درلودلو ستاینه وکړه او په مختلفو برخو کې اړتیا ته په کتو د پروژو د ډیزاین او پلي کولو ژمنې وکړې.
آغلې سوزانا وویل، چې په نږدې راتلوونکي کې د ننګرهار په بهسود، کامه، سره رود او دره نور ولسوالیو کې ۱۷۶ ناچاره او بي وزله مېرمنو ته د شېدو غواوې وېشي.
هغې زیاته کړه: «ستاسو د غوښتنواو وړاندیزونه په اساس به په راتلونکی کې په ننګرهار کې پروژې ډیزاین او پلي کړو.»
په یاده ناسته کې د ننګرهار د کرنې ریاست امرینو هم خپلي ستونزې، غوښتنې او وړاندیزونه د مؤسسې مسؤلینو سره شریکې کړلې.
