کندهار کې ۲۵ زره غواګانې د وژونکي طبق ناروغۍ پر وړاندې واکسین شوي
۱۴ سلواغه ۱۴۰۳ه.ش
۳ شَعبان المُعَظّم ۱۴۴۶ه.ق
د کندهار د کرنې، اوبو لګولو او مالدارۍ ریاست په هڅو، د ملګرو ملتونو د خوړو او کرنې ادارې (ایف. ای. او) په مالي او د څارویو روغتیا او صحت آمریت په تخنیکي همکارۍ، د لومړي ځل لپاره د کندهار ښار په ۱۵ ناحیو، دامان او ډنډ ولسوالیو کې د پښو او خولې (طبق) ناروغۍ د مخنیوي په موخه واکسین کمپاین پای ته ورسېد، چې په ترڅ کې یې ۲۵ زره غواګانې واکسین شوي دي.
یاد واکسین ټولټال ۲۵ زره دوزه وو، چې د څه کم دوو میاشتو په موده کې د کندهار ښار ۱۵ ناحیو او دوو ولسوالیو کې ۷۰۰ غواګانو فارمونو ته تطبیق شوي، چې موخه یې د مالدارانو ملاتړ، د پښو او خولې ناروغۍ پر وړاندې وقایوي تدابیر نیول، د غواګانو د مړینې کچه راکمول او په کندهار کې سالمه مالدارۍ پراخول دي.
بل لور بیا مالداران د دې کمپاین له تطبیق خوښ دي او د کرنې، اوبو لګولو او مالدارۍ ریاست او د ملګرو ملتونو د خوړو او کرنې ادارې له همکاریو مننه کوي، چې د دوی غواګانې یې واکسین کړې.
د یادونې وړ ده، چې د کندهار کرنې، اوبو لګولو او مالدارۍ ریاست د ملګرو ملتونو دخوړو او کرنې ادارې په همکارۍ یوه میاشت وړاندې هم د کندهار په مرکز او اتو ولسوالیو کې د کوچنیو څارویو د طاعون (PPR) واکسین کمپاین پیل کړی و، چې له مخې یې تر ۷۰ زره کوچني څاروي واکسین شوي دي.
