خوست کې د ځنګلونو او څړځایونو د پراختیا او خوندیتوب په پار لسګونه پروژې پلي شوي
۲۹ مرغومې ۱۴۰۳ھ.ش
۱۸ رَجَب المُرَجَّب ۱۴۴۶ه.ق
د خوست ولایت د کرنې، اوبو لګولو او مالدارۍ ریاست په اډانه کې د ملګرو ملتونو د خوړو او کرنې ادارې د ځمکې او ځنګلونو تلپاتې مدیریت پروژې (جي،اي،اف) له لارې ددې ولایت په درېیو ولسوالیو (صبري، باک او ځاځي میدان) کې د ۲۰۲۲ م کال راهیسې د ځنګلونو او څړځایونو د ساتنې او بیا رغونې په موخه لسګونه پروژې پلي شوي دي.
دغه پروژې د خوست د کرنې او چاپېریال ساتنې ریاستونو په همغږۍ پرمخ وړل شوي، چې د تېرو دوه کلونو په اوږدو کې یې د پام وړ لاسته راوړنې لري. په دغو پروژو کې د ۱۰ زره هکتاره ځنګل او څړځای مدیریت په موخه، د ځنګل او څړځای ساتنې ټولنو جوړل، نږدې ۲زره او ۵۰۰ هکتاره نوي ځنګل او څړ ځای رغول، د هغو سمیو لپاره چې اوبه نه لري، د لمریز سیستم او د ۲۰۰زره لیتره ظرفیت لرونکو د اوبو ۹ زېرمو جوړول، څهباندې ۳۵۰ د املوکو او مالټو بڼونو جوړول او ۵۰ شنې خونې او ۷۴ د چهارمغزو وړې قوریې جوړول شامل دي.
همدارنګه نږدې ۵۰۰ کسانو ته د لمریزو نغريو، د چهارمغزو ماتوونکي وسایلو او د شیدو ټولولو کیټونو، زرګونه کیلو ګرامه د ممپلیو او غرنۍ رشکې تخم او د سلګونه زره بېلابېلو مثمر او غیر مثمر نیالګیو وېش هم هغه کارونه دي، چې په یاده پروژه کې ترسره شوي دي.
دغه راز په دې برخه کې د عامه پوهاوي په موخه د ۱۲۵ ناستو، نږدې ۱۰زره کسانو ته د روزنیزو پروګرامونو او د ځنګلونو او څړځایونو د ساتنې په اړه عامه پوهاوي غونډې او ۳۱۵ غړو لرونکو ۱۸ د مالدارۍ ښوونځي جوړول هم ترسره شوي دي.
د ځمکې او ځنګلونو تلپاتې مدیریت پروژه په راتلونکي کې د پیوندي زيتونو، چهارمغزو، املوکو او نورو نیالګیو وېش، د شنو خونو لپاره د سبزیجاتو تخمونه او د کار په بدل کې د پیسو ورکړې برنامې پلي کولو ته دوام ورکوي.
د یادونې وړ ده، چې ټولټال ۱۱۲زره او ۵۰۰ اوسېدونکي چې په یاده سیمه کې ژوند کوي، د دې پروژې له فعالیتونو څخه په مستقیم او غیر مستقیم ډول ګټه اخلي.
د ځمکې او ځنګلونو تلپاتې مدیریت پروژې (جي،اي،اف) پروژه د ملګرو ملتونو د خوړو او کرنې ادارې له لوري په خوست ولایت کې د چاپېریال د ساتنې او د کرنیزو سرچینو د پیاوړتیا په موخه پیل شوې، چې د ځنګلونو او څړځایونو د بیا رغونې او پرمختګ په برخه کې یې د پام وړ ګامونه پورته کړي دي.
