د کرنې وزارت د ځنګلونو رییس کندهار ته د سفر په ترڅ کې له بېلابېلو چارواکو سره وکتل

۲۹ مرغومې ۱۴۰۳ھ.ش
۱۸ رَجَب المُرَجَّب ۱۴۴۶ه‍.ق
د کرنې، اوبولګولو او مالدارۍ وزارت د ځنګلونو رییس ملا سراج الحق میرویس ذاکري کندهار ولایت ته د خپل سفر په ترڅ کې ددې ولایت دکرنې ریاست د طبیعي سرچینو آمر او د یاد ولایت د ولسوالیو د ځنګلونو او څړځایونو مدیرانو سره په کتنه کې پر بېلابېلو موضوعاتو د خبرو اترو څنګ دوی ته لازمې لارښوونې او سپارښتنې وکړې.
ددغو لیدنو په ترڅ کې د ولسوالیو د ځنګلونو او څړځایونو مدیرانو د ځنګلونو او څړځایونو د ساتنې او پراختیا په پار خپلې ستونزې، لاسته راوړنې او فعالیتونه بیان کړل.
په همدې حال کې د کرنې وزارت د ځنګلونو  رییس ملا سراج الحق میرویس ذاکري د څړځایونو، ځنګلونو او طبیعي سرچینو د ساتنې په برخه کې ترسره شوي کارونه وستایل او ټینګار یې وکړ چې د څړځایونو، ځنګلونو او طبیعي سرچینو څخه باید جدي ساتنه وشي او په دې برخه کې باید اړین ګامونه واخیستل شي.
د غونډې په ترڅ کې د ولسوالیو د ځنګلونو او څړځایونو مسؤلینو ته سپارښتنه وشوه، چې د څړځایونو او ځنګلونو د ښې ساتنې لپاره قانوني او رسمي لارې چارې غوره کړي او خپلې چارې د کرنې ریاست سره په همغږۍ ترسره کړي. همداراز ددې غونډې په ترڅ کې د طبیعي شتمنیو د خوندي کولو لپاره اړینې سپارښتنې هم شریکې شوې.
ورپسې د طبیعي سرچینو آمریت مسؤلینو دتېر او راتلونکي کال د پلانونو او بودیجې د مصرف په تړاو خپل راپورونه وړاندې کړل. د غونډې ګډونوالو ټینګار وکړ چې بودیجه په مناسب او اغېزمن ډول وکارول شي او د ځنګلونو، څړځایونو او طبیعي شتمنیو د ښه سمسورتیا لپاره عملي ګامونه پورته شي.
په غونډه کې د کندهار د کرنې ریاست د طبیعي سرچینو مسؤلینو او د ولسوالیو استازو خپلې ستونزې شریکې کړې، چې د ځنګلونو لوی رییس د هر اړخیزې همکارۍ ډاډ ورکړ.
په دې غونډه کې دغه راز د منګالي فارم د ښه مدیریت او د بودیجې پر اغېزمن لګولو هم خبرې اترې وشوې.