د کندهار نېش کې د ۲ میلیونه افغانیو په ارزښت د چکډېم رغنیزې چارې پیل شوې
د کندهار د کرنې، اوبو لګولو او مالدارۍ ریاست په هڅو او د کرنې، اوبو لګولو او مالدارۍ وزارت د پراختیایي بودیجې له لارې، په نېش ولسوالۍ کې د دوه میلیونه افغانیو په ارزښت د چکډیم د رغنیزو چارو پیل وشو. دا پروژه د یو خصوصي ودانیز شرکت په تخنیکي همکارۍ او د طبیعي سرچینو آمریت تر مستقیمې څارنې لاندې ترسره کېږي.
د یاد چکډیم د رغنیزو چارو د پرانیستنې په مراسمو کې د کرنې وزارت څخه راغلي پلاوي، مولوي عبدالله جان، انجنیر نجیب الله همت، انجنیر فرهاد رؤفي، د کندهار د کرنې ریاست استازي انجنیر روح الله روحاني، د نېش ولسوالۍ ولسوال، امنیه قومندان، د استخباراتو استازي او د سیمې مخورو مشرانو ګډون کړی و.
یاد چکډیم د ۱۴۰۲ کال په اوږدو کې جوړ شوی و، خو ځینې رغنیزې چارې یې پاتې وې. اوس به د دوه میلیونه افغانیو په لګښت د شاوخوا دوو میاشتو په موده کې بشپړ ورغول شي. د پروژې په ترڅ کې به ۱۰ کسانو ته په فني او ۲۰ کسانو ته په غیر فني توګه د کار زمینه برابره شي.
د دې چکډیم موخه د نېش ولسوالۍ باراني اوبو راټولول، د ځمکې لاندې د اوبو سطحې لوړول او د بزګرانو او مالدارانو ملاتړ کول دي.
د یادونې وړ ده، چې په نېش ولسوالۍ کې د دې چکډیم ترڅنګ، یو بل چکډیم او ۱۵۰۰ څاګانې هم کېندل کېږي، چې په ترڅ کې یې ۲۰۰ سیمهییزو اوسېدونکو ته د کار زمینه برابره شوې ده.
