کندهار کې د ننداریزو کروندو جوړولو په موخه پر ۷۵ بزګرانو د غنمو اصلاح شوی تخم، کیمیاوي سرې او نغدې مرسته ووېشل شوه
کرنې، اوبو لګولو او مالدارۍ وزارت په پراختیایي بودیجه د ننداریزو کروندو پروګرام له لارې د کندهار په بېلابېلو ولسوالیو او د مرکز ناحیو کې د غنمو د ننداریزو کروندو جوړولو پ پار ۷۵ مستحقو بزګرانو ته د غنمو اصلاح شوی تخم، کیمیاوي سرې او نغدي مرسته ووېشل شوه. د دې مرستې وېش د کندهار کرنې ریاست په تخنیکي همکاري او د کرنیزو چارو آمریت تر مستقیمې څارنې لاندې په شفافه پروسه کې ترسره شو.
د پرانیستې مراسم د کندهار کرنې ریاست رئیس، الحاج مولوی فضل الباري فضلي په مشرۍ ترسره شول، چې د کرنیزو چارو آمر، مولوی شمس الرحمن موسی او انجنیرانو هم پکې ګډون کړی وو. د مراسمو پر مهال الحاج مولوي فضل الباري فضلي بزګرانو ته وویل: «یاد غنم تاسو ته د خوراک لپاره نه، بلکې د کرنې د پرمختیا لپاره وېشل کېږي، چې تاسو یې په خپلو ځمکو کې وکرئ او د حاصل په وده کې مو مرسته وکړي.» نوموړي زیاته کړه چې د افغانستان نږدې ۸۰ سلنه اقتصاد په کرنه ولاړ دی او د افغانستان اسلامي امارت هڅه کوي، چې د کرنې او مالدارۍ سکتور ته پاملرنه وکړي او بزګرانو ته پر وخت او لازمو مرستو د لاسرسی زمینه برابره کړي.
په دې مرستې کې هر بزګر ته ۲۵ کیلوګرامه اصلاح شوی د غنمو تخم، ۵۰ کیلوګرامه سپینه سره، ۲۵ کیلوګرامه توره سره او نغدې مرسته ورکړل شوه. د مرستې تر وېش وړاندې مستحقو بزګرانو ته د اصلاح شوي تخم کرلو او د سرو د استعمال په اړه روزنیز پروګرام هم جوړ شوی و، څو دوی وکولای شي خپل حاصلات زیات کړي.
د یاد پروګرام موخې په کندهار کې د اصلاح شويو تخمونو دودول، د لږې ځمکې څخه زیات حاصل ترلاسه کول او بزګرانو اقتصاد ته وده ورکول دي. بزګرانو د کرنې وزارت او کندهار کرنې ریاست له مرستو مننه وکړه او ویې ویل، چې دا تخم او سرې به د دوی په اقتصادي وده کې مهم رول ولوبوي.
یاده دې وي، چې تېر کال هم د ننداریزو کروندو د پروګرام له لارې د کندهار په ځینو ولسوالیو کې لسګونو بزګرانو سره ورته مرسته شوې وه.
