د کندهار بولدک کې ۵۰ کیلوګرامه بې کیفیته غوښه ونیول شوه
د کندهار د کرنې، اوبو لګولو او مالدارۍ ریاست، د بولدک ولسوالی کرنې او مالدارۍ مسؤلینو او امنیتي ځواکونو په همکارۍ، ۵۰ کیلوګرامه بې کیفیته او بې هویته غوښه د سپین بولدک فرضي کرښې له لارې ونیوله.
د سپین بولدک ولسوالی کرنې او مالدارۍ مسؤلین وایي، چې یو شمېر کسانو غوښتل دغه بې کیفیته غوښه د سپین بولدک له لارې کندهار ښار او نورو ولایتونو ته ولیږدوي. دوی پلان درلود چې دغه غوښه پر یو شمېر خوراکي پلورنځیو، قصابیو او هوټلونو وپلوري. خو د کرنې او مالدارۍ مسؤلینو او امنیتي ځواکونو په همکارۍ د دې قاچاق مخه ونیول شوه.
د مالدارۍ آمریت له خوراکي پلورنځیو، هوټل لرونکو او ښاریانو څخه غوښتنه کوي، چې تل تازه غوښه له ډاډمنو پلورنځیو څخه وپيري او له چمتو شوې کوفتې او نامعلومه غوښو پېرولو څخه ډډه وکړي.
د کندهار مالدارۍ آمریت د پاکستان سره په فرضي کرښې د امنیتي مسؤلینو څخه غواړي، چې د بې کیفیته غوښو د قاچاق په مخنیوي کې جدي اقدام وکړي او عاملین د قانون منګولو ته وسپاري.
په دې وروستیو کې د مالدارۍ آمریت او امنیتي مسؤلینو د بې کیفیته غوښو د قاچاق په مخنیوي کې زیاته پاملرنه کړې. شاوخوا درې اونۍ وړاندې یې هم ۶۰۰ کیلوګرامه بې کیفیته غوښه نیولې وه.
