هلمند کي د لبنیاتو ٦٠ تنه کاروباریان وروزل شول
دهلمند ولایت دکرنې، اوبولګولو او مالدارۍ ریاست، د مالدارۍ او حیواني روغتیا آمریت له لوري، مرکز لښکرګاه بولان سیمه کې د ځنځیري ارزښت کرنیزې مؤسسې په مالي همکارۍ ددې ولایت دلبنیاتو ٦٠ تنو کاروباریانو ته په بېلابېلو برخو کې روزنیز پروګرام په لاره واچول.
په دغه روزنیز پروګرام کې ګډونوالو ته د شېدو د پروسس، حفظ الصحې ، بازار موندنې او د کیفیت او کمیت له پلوه د لبني موادو څخه د اړتیا وړ خوراکي توکیو چمتو کولو په برخه کې لازم معلومات وړاندې شول.
په ورته وخت کې ګډونوالو دغه ډول پروګرامونه مؤثر وبلل او د کرنې ریاست له مسؤلینو یې ددوام غوښتنه وکړه .
د هلمند دکرنې ریاست هڅه کوي، چي په دې ولایت کي خصوصي سکټور ته وده او پراختیا ورکړي ترڅو د کورنيو محصولاتو صادرات پیاوړي او د بې کیفیته وارداتو کچه ټیټه شي.
